Falam ah Covid 19 mina 4 an hmu

Covid 19 mina cu January 9 le 11 ih hmuhsuahmi an si ih, tuah Falam Siizungpi ah zohkhen in an um tiah theih a si.

Covid 19 mina 4 lakih hmuhsuah hmaisabik cu Kalaymyo ih um kum 26 mi a si ih January 9 ah Fang phur in Falam lam a pan.

Sun Ceu khan luan harhdamnak check gate ah RDT Test Kit thawn nat zohnak an nei tikah Covid 19 nat a nei timi an hmusuak. Amah cu Falam Siizungpi ah kuat so cih a si tiah theih a si ih mawṭaw thluntu mipakhat cu Lungpi Quarantine Center ah zoh hrih dingin an kuat.

Cuihni thotho ah Relsing khua um mawṭaw thlun kum 20 mi taksa par ah Covid 19 nathrik an hmu ih Falam Siizungpi ah tuamhlawm dingin an kuat so cih. Mawṭaw mawngtu khal mina rinhlel dinhmun in Lungpi Quarantine Center ah an kuat ve.

Falam Covid-19 Committee ṭuanvonei le Dr ṭhenkhat in Covid nat neitu Relsing mi hnungzul in Relsing khua ah nat nei an um le umlo zohciangnak an va nei nan mawṭaw thluntu naivai ih um minung 15 taksa par ah nahrik an hum lo tiah MRTV in a tarlang.

January 11 ih hmuhsuahmi Covid 19 mina cu Tedim ihsin Falam ih ratlung kum 46 le kum 20 mi mipahnih an si ih nat an nei mi hmuhsuah a si veten Falam Siizungpi ah enkol dingin an kuat so.

“Tuini ih hmuhsuahmi Covid 19 mina pahnih cu Siizungpi ah kuat so an si cih ih an hnen ih ratlung an sungkhat mi panga khal Lungpi Quarantine Center ah an kuat cih. Tufangah Falam Siizungpi ah Covid 19 mina 4 an um ih Lungpi Quarantine Center ih zohkhenmi minung 15 an um.”

“Kan kiang naivai ah Covid 19 mina an pung zetih kan ralring a ṭul nasa. Tedim khalah tuisun lawng ah Covid 19 mina 20 luan an hmu tiah kan thei. Curuangah kan nih Falam khal, kan ralring sinsin a ṭul” tiah Falam tualsungum mipakhat in a sim.

Leave a Reply

Your email address will not be published. Required fields are marked *