Falam ah Covid 19 mina 2 hmubet + Falam dinhmun

Kan kiangkap naivai lawng siloin Falam khuasung rori ah Covid 19 nat nei an um thlang ruangah Falam Covid-19 Committee cun nat darhsinlo dingin nasaten hmalaknak a nei.

Kan dung zarh lamin Falam khuasung ah Covid natnei hmuhthok a si ih cui ṭum in Falam Covid-19 Committee cun nasaten hmalaknak a nei thok.

“Khuasung lawng siloin Falam peng, Rihkhawdar lam khalah local transmission a um thlang. Curuangah kan ralring nasa ṭul. Tu khalah mina thar 2 an hmubet ti`n kan thei” tiah tualsungum mino pakhat in a sim.

Covid 19 mina thar hmuhsuahmi cu Yangon ihsi ra tlung, Lungpi FQ ih um mipakhat le Falam khuasung ih natnak luttertu mipakhat ih suansawng sinmi a si.

“Falam khuasung ih nat karhmi cu amah ruangah tisehla a suallo men ding. Ziangahtile Covid 19 boruak ih thlundingmi daan thlun loin tui`kum kumthok lamah a thupten Falam khuasung ah a lut suak. Nat a nei timi an hmusuak hnu cu a rak tlaituk zo. Khuasung um midang a rak suan man” tiah tualsungum mino pakhat cun a sim hrih a si.

Cumi mipakhat ruangah Falam, Sunceu khaan luan ih harhdamnak check gate ah CCTV an bun phah ih covid boruak thawn pehparmi daan khal a thar in an suah sal a si.

Ahlan ahcun hmun dang ih rak ra pawl cu an umnak ṭuanvonei pawl ih midam sinak theihpinak caphek an keng le Khuasung luh an siang cih nan, tu ahcun Falam khuasung luttu pohpoh cu nat check nak an nei ta dingih midam a si timi an hmusuak lelawng khuasung ah an lut siang ding tiah theih a si.

Tudinhmun ah Falam Siizungpi ah Covid 19 mina 10 an um ih an zaten Isolation Ward ah zohkhen in an um a si.


zuk : Timmy Htut

Siarbet: FALAM : A Thup Thair ih cangvaitu mipakhat ruangah Covid nat a karh phah thluh

Leave a Reply

Your email address will not be published. Required fields are marked *