Falam ah CDM i teltu an pung, Palik pahnih khal CDM ah an tel thok

Mipi authawm ngaisak in le ralkap ukhruainak hnuai ih cozah cetcangdan tuar thei nawnloin CDM ih telthoktu rampihuap cozahhnaṭuan an pung vivo ih, Falam khalah palaik pahnih le GAD zungih hnaṭuan mipakhat in CDM ah an telthok thu tlangthannak an nei.

March 1, mizaan lam ah Falam GAD zung ih hnaṭuan Mai Rebecca (GAD zung ihsin CDM i tel hmaisabik) cun CDM ah a telthokzo thu a tarlang ih tuisun, March 2 khalah GAD zung ih hnaṭuan Mai Siang Hlei Tlem cun CDM ah a tel thok thu theihternak capi a suah.

Falam ih palik pahnih khalin CDM ah an telthok thu, mipi khuatlang theihternak an nei ih Falam palik zung ih Corporal Sai Thang (Thar Nge) cun “ralkap ukhruainak hnuai ah hna ka ṭuan nawn lo ding. Mipi lam ah ṭangin CDM ah ka tel thok. Asinan, hnaṭuan ka bansan tinak siloin mipi lam ah ṭangin CDM ka tuah mi a si” tiah March 1 ah video tawi a thlah.

March 2 khalah Falam palik zung ih Private Myo Tin (ရဲဘော်မြို့တင်) in CDM ah a telthok thu tlangthannak video tawi a thlah ih “ralkap ukhruainak hnuai ah hna ka ṭuan nawn lo ding. Mipi lam ah ṭangin CDM ah ka tel thok. Asinan, hnaṭuan ka bansan tinak siloin mipi lam ah ṭangin CDM ka tuah mi a si” a ti.

Mizaansun lam khalah Falam cozah zung ih hnaṭuan minung 100 luan in CDM ah an tel thu theihternak capi an suah ih March 2 khalah FALAM မြို့နယ် အခြေခံပညာကျောင်ဝန်ထမ်း minung 23 in CDM ah an tel thu theihternak capi an suah a si.

Leave a Reply

Your email address will not be published. Required fields are marked *