Duhphorhnak nei ruangah CUSR sungtel 2 kaihkhih tuar

Rakhine ramkulh, Ann myone ah ralkap uknak duhlo lamzawh duhphorhnak nei ruangih kaihkhihtuar CUSR (Chin University Students in Rakhine State) sungtel pahnih an um thu theih a si.

February 9 ih duhphorhnak nei ruangah kaihkhihtuar an si tiah theih a si ih Salai Min Hteik Aung cu February 10 ah a umnak inn ah Ann myone palik in an kai.

CUSR secretary Mai Yadana Aung khal February 9 zaan sim ah a umnak inn rori ah kaihkhih a tuar tiah theih a si ih Chin University Students in Rakhine State sungtel ah ralkap uknak duhlo duhphorhnak nei ruangih kaihkhih tuar mipahnih an um zo a si.

Hih thuthawn pehpar in Chin University Students in Rakhine State pawlkom cun “Ann Myone ah rampi cozah thuneihnak latu ralkap uknak duhlo ruangih duhphorhnak neitu mi 6 kaihkhih an tuar zo ih CUSR sungtel Mai Yadana Aung le Salai Min Hteik Aung khal an tel ve”.

“Palik kaihmi pawl hi an sungkhat unau pawl thawn hmuntonaw khal an sianglo tiah kan thei. CUSR in titheitawk suahin thlahzalen an si theinak dingah hmalaknak kan nei a si” tiah FB cahmai ah an tarlang.

Ann Myone ih kaihkhih tuar pawl hi duhphorhnak nei ruangih kaihmi an si nan thubuai an orhtermi cu pukma 25 (mibur um tlang loding) a si thu theih a si.

Leave a Reply

Your email address will not be published. Required fields are marked *