Dr. Run Bik in Falam Bazaar thar sak dingin Khawtlang mipi hnen ah thu bur nak a nei

Tuhlan kum 20 zikih Falam Townhallpi sak thar danding rel suak in a tak ih tawlrel haihotsuaktu Dr. Run Bik cun kum 30 upa zo mi Falam Bazaarpi khal sak thar thei tum ding in khawtlang mipi hnen ah thu bur nak a nei.

Falam Bazaarpi an rak sak laiah sumsaw lam tlasamnak ruangah duhthusam in rak sak thei a si lo ih mipi hrang ih hman tawk ding ih sak cu a rak si nan a kum a upa zo ruangah sak thar sal beiseitu an tam zet.

Hih thu ah, Dr. Run Bik cun “Nikum February thla ih Aung San Suh Kyi Falam a rat ṭum ah kan khaw nu khaw pa pawl in acozah in town hall le bazaar in sak sak aw tiin an rak dil.Suh Kyi cun acozah in harhdamnak lam,zirnak le lamziin tivek a tuah ṭulmi a tam tuk ih bazaar le town hall tivek cu nan mah ten raksak uh in ti” tiah a ti.

Hitivek dinhmun a si ruangah Dr. Run Bik tawlrelnak, Chinram cozah le Siipin ṭuantlangnak in Falam Townhallpi cu sak thar sal a rak si ih, tu ah ṭheh fel a si zik thlang.

Dr. Run Bik cun tuṭum khalah a seherh zet mi Falam Baazarpi sak ding thuthawn pehpar in Chinram Siipin bawi U Soe Thet hnen ah Cozah lam in sak tum maw tum lo thu sut fiangnak a nei ih U Soe Thet cun “tui a ra ding kum hrangah Falam Municipal hrang budget ks. ting 12000 a um nan cumi I si bazaar kan sak cun thil dang thansonak kan tuah their lo ding. Cui ruangah bazaar cu acozah in a sak thei lo dingih a khawmi pawl in a sak dan an hawl a ṭul” ti`n a let ih Pu Run Bik cun “a si le Indian embassy bomnak in sak kan tum ke cu tiah Falam Bazaarpi sak thar sal ding beiseinak a neih thu a sim cu U Soe Thet khal in a ṭha tuk ti`n a let ve sal a si.

Pu Run Bik cun Falam Townhall sak nak ding ih India ram cozah a rak dawr dah mi vekin Bazaar hrang khal ah tawlrel theih a si thu a rel suak ih, a mah cun, “Indian embassy policy an thleng lo ahcun ambassador in bom thei a timi project hrangah $million 1 (Ks.ting 14000 )tiang a recommend thei. Falam town hall hrang kha India ah Ks.ting 10000 tiang kan dil I ambassador pa cun a lung a kimnan Border Affairs minister Lt.Gen. Ye Aung in Falam hrangah a tam tuk A hrekah thumaw tii CM Lian Luai a fial I Ks ting 5000 kha CM Lian Luai I ting 3500 in hawl sak a tul a si hi” tiah a ti.

Amah duhthusam cun Falam Bazaarpi cu dot 3 innpi sak thei a beisei ih Bazaar saknak ding bawmnak dil sung le a innpi sak sung tikcu zatekom kum 3 hrawng rei ding zumnak a nei a si.

Leave a Reply

Your email address will not be published. Required fields are marked *