Dothlennak : Humhimawknak hrangah na theih tengteng ṭulmi thil thupi pakhat

2021 Dothlennak ih humhimawknak hrang kan theih tengteng ṭulmi thil tamzet a um ih cumi lakih thil thupi pakhat cu online ih zuk kan thlah ṭheumi le kan phone ih zuk phunphun kan retmi thawn a peh paraw.

Mizaan tihni lam ah Myanmar model hminthang Htar Htet Htet cun ramri hmunhim pakhat ah meithal kai ih a zukmi cu online ah a thlah ih nasaten a darh.

Myanmar social media khawvel lawngah siloin leitlunhuap hminthang media tamzet khalin an tarlang ih, comment kan zoh tikah zuk a thlahmi thawn pehpar in soiseltu tamzet an um ti kan hmu thei.

Cumi ah mipakhat cun “hivek zuk kan thalh hi mipi thazang peknak ah a ṭha zet. Bulpak zawng khalin hmin lar sin nakah hman a theih. Nan, kan thei dingmi pakhat cu himi zuk hin keimah, kainnsang, karualpi le karalkappi hrang tiang siatnak a thlen thei pang maw tihi kan ruat ṭha a ṭul” a ti.

Asimduh san cu a cekci in ka theilo nan zuk ih a tel cih ṭheumi metadata thu a sim duh ti`n ka ruat.

Metadata

Metadata cu zuk tivek ah zoh men ih hmuhtheihlo dingin an retmi thilthupi (information data) pakhat a si. Cumi ah zuknak ih hmanmi phone hmin, camera hmin, (zuk firawk theihlo dingin zuk neitui` hmin khal an ret ṭheu) aneitu hmin, zuk tumlam le kaulam, zuk tikcucaan, zuknak hmun GPS Coordinates a tel. (GPS Coordinates data telmi zuk cu Phone le Camera ih zir khal a si ih setting khalin phit a theih)

Google map ah zuk ih GPS Coordinates thawn an hawl cun zuknak hmun cekci olsamten hawl a theih. Curuangah nangmah hrang lawng siloin na umpi lole na relhnak ralkapbu tiang an tuar thei. Technology san a si tikah Drone vanzam fate ah na umnak GPS Coordinates an thun cun olsamten a lo hawl hmu thei ih nangmah hrang lawng silo na rualpi, naralkappi tiangin an tuar thei a si.

Ziangtin zuk sungih metadata kan hlon ding?

Santhar camera le phone zate deuhthaw in zuk pakhat kan zuk tikah Exchangeable Image Format (EXIF) timi data (metadata) tel dingin an tuah cia. Cumi ahcun na zuk lai ih camera setting na hmanmi tiang ngankhum a siih ṭhenkhat ahcun zuknak hmun inn address tiang a tel cih ṭheu. (Facebook, Twitter le Instagram ih zuk kan thlah tikah cuvek data pawl cu zuk kan upload zawngah automatic in a hlon faiaw thluh . Nan, Technology san a si vekin computer thiamsang pawl in an reverse sal thei thotho).

Computer : Metadata (EXIF) na hlon duh cun zuk kha right click awla properties na hmet hnu ah details timi kha hmetaw. Atanglam ih a sen rong thawn kan kulhmi “Remove Properties and Personal Information timikha hmet aw.

Atanglam ih 1,2,3 vekin “Remove the following properties from this file” timi hmet aw la a tanglam ih box tete ah na delete duhmi tick thluh aw la OK hmet aw. Na hlawn duhmi cu a fai thluh si mei.

iPhone le iPad : (ios) EXIF data hlon ding cun ahranten app download a ṭul. “Metadata Remover EXIF GPS TIFF” timi free app download aw la na install hnu ah app ong aw. Photo hril aw la setting icon ih clear all metadata timi hmet aw. App in zuk sungih na device metadata a hlon thluh dingih hmin thar a pe ding.

Location data tello dingin photo zuk dan (iPhone, iPad)
ios camera app in location data lak lo dingin tuah dan a um. Cutin na tuah duh cun location sharing feature na phit ṭul.

Setting ah lut aw la Privacy na hmet hnu ah Location Service hmet aw. Camera timi ah Never hmet aw. Cutin na tuah le Camera app in na umnak location data a la theilo dingih photo na zuk tikah location (geo-data) a khum tel lo ding. (Phone model lole a ram ih zirin setting umnak a dang thei. Nan, location phit nak setting cu a um thluh)

Android : Na zuk ah location na telh duhlo le camera setting in phit a theih. Camera na hmet hnu ah setting ah lut aw. Store location data, Save location data lole geo-tag timi kha phit aw. Atlangpin Android Phone ahcun camera setting ah location lole geo data (location/goe-tag) phitnak a um tlangpi. Cumi na phit hnu cun photo na zuk tikah location data a tel nawn lo ding.

Camera location setting phit hlan ih zuk zomi pawl khal location hlon a theih. Nan computer ih hlonhlo vekin a ciang thei ngai lo. Phone ih zir khal a si ih miṭhen cun Appstore ih EXIF Eraser timi an hmang.

Na phone ah zuk thupi ret hlah

2021 Dothlennak ah phone sungih zuk retmi ruangih buainak tongtu hmuh ding an tam zet.

Tahṭhimnak ah Kayin ram lam ih raldo zir mino 70 lenglo kha training kai lai ih an zuk pawl ruangah kaihkhih an tuar mi a si tiah KNPP အတွင်းရေးမှူး-၂ ခူးဒယ်နီရယ် in interview tuah nakah a rel.

Ramri ihsin antlunglam ralkap check gate ah mino ṭhenkhat ih phone an zoh sak cu raldo an zir lai zuk pawl hmuhsuah a si ruangah SAC ralkap in Thawng ah an khum.

SAC ralkap in mi phone check sak an hmang ruangah kan Chinmi ṭhenkhat khal an FB profile zuk an thleng phah thluh ih zuk thupi an post zo mi tiang an delete sal phah thluh.

Zuk hi kan thuanthu ti lang saltu a si tikah miṭhen cun phone ih retmi zuk ṭihnung hlon siang lo in an um. Nan, zuk ṭhenkhat ruangih nunnak liam tiang tuar theih dinhmun a si tikah ti dan ding a laklawh zet.

Asile, phone thawn kan zukmi zuk thupi pawl cu kan delete thluh ding maw? Maw, kaih kan tuar khalle ziangtiṭha kan ti men ding?

Himtheibik ih zuk ret ṭhat dan

Device sungih Zuk thupi le Video thupi pawl cu ret ṭhat dan phunphun a um ih na duh cun memory card, pendrive tvk khalah a hranten na ret ṭha thei. Nan, a hlo lole a siat pang cun vaithang hlo i hlo, hlota rori a si. Na taksa par ih na ret ringring phei cun ralkap pawl le midap an hmang tikah an hmu pang cun phone sungih zuk thupi na ret thawn a bangaw thotho.

Curuangah a himbik pakhat cu cloud storage (Dropbox, Google Drive, One Drive tvk) hman hi a si. Cloud storage ah zuk, video le ca phunphun ret a theih ih cumi pawl cu internet umnak tapoh ah na zoh thei ih na download thei.

Cloud storage hman kan ti tik khalah na hman dan ih zir sawn a si. Tahṭhimnak ah na phone ah Dropbox App download in zuk pawl na ret cun na phone an zoh tikah App an hmu dingih a sung an zoh cun na retmi hmuahhmuah a lang thluh thotho ding.

Curuangah App download loin na phone browser (Chrome, Firefox, UC browser, phone tinkim ih um cia mi internet browser tvk) ah direct in “www.dropbox.com” tiah ngan aw la account signin na tuah hnu ah duh tawkin na hmang thei. Alakin 2 GB na hmang thei. Cumitlun cu paisa pek ṭul. Account na neilo le email thawn signup ṭul. Dropbox account tuah dan video tanglam ah zoh aw….

Kan hngilh lo dingmi thil thupi pakhat cu account kan tuah ih tuah ṭulmi a cem zikah Dropbox download dingin a lang ding. Video sung ih langmi vekin download timi a lang caan ah phit aw la a thar in dropbox website ah lut sal aw. Cutin na duh tawkin zuk le video na upload thei ding.

Himtheibik in zuk le video ret ding a si tikah kan theih ṭulmi pakhatleh cu browser thawn dropbox kan ong hnu, kan hman ṭheh hnu ah browse history kha thianfai ta aw. Cutin na tuah le na hrangah a him bik ding a si.

Leave a Reply

Your email address will not be published. Required fields are marked *