Diklonak thawn Lian, Neinung ih Hngal kan um hnuaihni kan Falam ah

Kan Falam ah miṭhenkhat cu dik zetih hna an ṭuannak thawngin le an zuamnak thawngin Pathian in a thlawsuah haiih tangdor mi neinung khal an um ruri. Asinan miṭhenkhat pawl in sumpai kan laklut daan cu Cozah ih duh lomi (thil le ri thawn) tuahṭuannak le zuarnak in siseh, Cozah ih khammi riittheih sii le vai thawn sumdawnnak im maw sumpai hawl ih mi neinung khal cu an um.

Ṭhenkhat cu Company hna an ṭuannak ah an ngah ding zat hnakih tam le miat tengteng dingih hna an ṭuannak ruangah mi neinung le lian khal cu an um. Cule, ṭhenkhat cu Cozah hna an ṭuannak ah mipi hnen ihsin diklo zetih sum laklut ruangih mi neinung khal an um thotho.

Hiti ih hna kan ṭuan cu kan mah le Pathian karlak cu asi ko nan khawpi, vengpi pawl lakah le khuasung tal ahcun hngal le puarthau tukin um lo hai sehla ziang tluk in so a ṭha ding. Falam hi khua fate kan si ruangah kan tuahṭuan mi, kan hnaṭuan daan tete pawl hi a cekci cun kan thei aw thluh lo ding nan a awm tawk cu kan thei aw thei men ding.

Dik zetih hnaṭuan ruangih mi neinung asimi pawl cun an va hngal pang khal le a zia te um. Asinan diklonak thawn na tuah, na ṭuan, sum na hawl ruangih mi neinung na si ahcun hngal le puarthau in um pang hrimhrim hlah aw, tangdor tum sawn aw. A dik loih na ngah mi pawl in ṭhathnemnak a lo pe ngaingai cuang lo ding. Curuangah hngal pang hlah uh si, tangdor sawn kan tum cio pei tiah duhsaknak tumpi thawn….

Saya Thang Lian (Falam)
via FMP Cazual

Leave a Reply

Your email address will not be published. Required fields are marked *