Dear, Bualpi ………

Bualpi khua cu Falam peng, Nimzawl ram ih ummi a si. Ahlan ah Zahau pa a rak um dah na`n a thi maw, a vaai ti khal kan thei lo tiah Nimzawl khuabawi Pu Hrang Hlei in a sim ih cui` hmun cu Zahau Tlaang tiah kan ti tata a ti. Cutawk ah Zawlpi pawl an um a si.

Cui` hnu ah 1975 ihsin 2003 tiang Pu Khaw Lian Tai, Pu Ral Sai Lo ih nau in khua a to saal. 2002 in 2008 tiang Pu Thang Hrim (Bualzawl, Falam peng) cun Cang-ai va khua in a hung ceer ih a um leh, ih atu ah a nupi a um lai an ti.

Cuih hmun cu Falam peng thingram zung in Cicai khua ah zungṭhen tuah in an rak kil dah. Asinan atu ahcun Siyin thingram zung in an kil ti a si. Cuih ram lawng cu Falam peng Council uk san ah leithuan ih faang cing dingin Zi-chaung tiva laak sak dingin cozah hnen ah an rak dil dah. Cutik ah Rev S Hre Kio ih nau, Pu Ṭha Bik in set-hmuh lay-yar zungih ṭuanvo a laak lai caan a si.

Bohmu Zaw Oo Han in Bualpi hmun ih acres 500 cu a run dil ih a kau tuk aw ti`n acres 400 a khirh saal ih Pu Ro Khum, Pu Van Lal Hual, Pu Dia Dia, Pu Hniar Tin Mang le Pu Thang Dum pawl khal in an dil cio ti a si.

Cuih hmun ah khua to dingin minister Pu Mang Hen Dal in onnak a tuah hnu ah inn 811 cu Sep 1, 2016 ah JCB pali thawn zinglam nazi 6 ihsin zaanlam nazi 1 tiang an rawt fai. Hitler in Poland ram a vun luh hnawh a bang titu tla an um. Palik 300 in an kulh ih zohman an lut thei lo ti`n kan thei.

Himi ruangah Pu Hau Za Nang, Pu Lal Bia, Pu Dar Luai, Pu Lian Cung, Pu Van Bawi Uk le Pu Hnair Za Lal tepawl cu thawng an thlaak phah a si. Cumi hmun cu, atu ahcun mah le tidan kongzawng in caan ṭha la in duhduh an tuah ih Nimzawl khua, Falam cozah uktu lam in teh theihpinak an nei maw ti cu mipi in theih an duh cio ka zum.

Cozah thar ah teh ziangti`n an ruat ding ti khal thlir le tawlrelpi dingin mipi in ruah cia a ṭul. Tui` kan cozah ih kutneh langnak a siih netalam ah nisuahnak lam ihsin vuankyi teh kan co ve leh pei maw thei hlah. Bualpi ah khua to suak ta sehla Falam hin Amyotha hluttaw pakhat kan ngah bet ding zum a um.

Laimi phunzakim telmi Bualpi inn neitu pawl “hnemnak” ah Cung Pathian in nan bulpak le innsang cio hnen ah thluasuah pe in, lo hnem cio hai hram seh tiah a Ni cam thlennak September 1 ah thlaza cam in kan lo tuarpinak ka hun ngan a si.

Pu Khup Hlei Thang
via CH daily news

Leave a Reply

Your email address will not be published. Required fields are marked *