Daw Aung San Suu Kyi in Covid – 19 Falam Volunteer pawl Sunloih Capi pek

Covid – 19 nathrik lak ihsin Falam khuapi kilhimtu Covid – 19 Falam Volunteer pawl cu rampi thuron Daw Aung San Suu Kyi in sunloihnak capi a kuat thu theih a si.

Covid – 19 Falam Volunteer

June 30 ni-thla khen mi sunloihnak capi a siih, cuih ca pawl cu rampi Social Minister Dr. Win Myat Aye in Tedim khua a haal phah ah, Covid – 19 Falam Volunteer pawl hnen ih pek dingin a keng cihmi a si.

Volunteer 30 pawl hnen ih pekmi capi a siih ngahhrihlotu khal an um tiin Volunteer hotu Salai Nhgepi in a sim. Amah cun,”Volunteer pawl hi ṭum hnih in kan sawmkhawm awmi a siih, a thar lutsaalmi pawl thawn mipum 45 lenglo kan si thlang. Volunteer training kaaitu pawl lawng capi pek a siih adang a rak zonzaitu pawl hrang sunloihnak capi tal ngah thei dingah kan tawlrel rero saal” a ti.

Cuih capi cu Covid 19 boruak a reh tikah hmunkhat te`n sunglawi deuh in pek saal an tum ih, Falam vuanthok bawi AD Pu Ca Awi cun, “rampi hotu rori ih hminkhen thawn capi pekmi cu sunglawi deuh in kan pek ding. Kan Volunteer pawl ih pumpeknak cu a maksaktuk ruangah boruak a ong deuh tikah ṭha te`n lungawi thusim in sunloihnak kan tuah leh ding” tiah a sim.

ref:CH daily news

Leave a Reply

Your email address will not be published. Required fields are marked *