Daiziar i inn tlung tum Mipi cu Falam palik in Mitthli tlak bomb thawn an kap

Thlacamnak nei in mah le inn cio i tlung tum Falam ih duhphorhnak neitu mipi cu Gospel biakinn hmai ah Falam palik in mitthli tlak bomb thawn an kap ih minung 3 an kai.

Faizong gate hmai ih duhphorhnak neitu Falam mipi cu palik le meithal keng ralkap in ziinpi kaphnih in an kham thluh ih “mah le inn cio ah nan tlung lo a si le kan lo kap ding” tiah an ṭhih ruangah hruaitu ṭhenkhat le Pastor pawl relremnak in thlacamnak nei hnu ah mah le inn cio i tlung hrih dingin an lungkim tlang.

Gospel biakinn hmaiah thlacamnak nei ta ding i an hngakaw lai cu Falam palik in ralrinnak ṭhiṭha pe cuang loin mitthli tlak bomb thawn an kap cih.

Mino pakhat cun “Falam san thuanthu ah tui` ni vek buainak hi a suak dah hrih lo. Hitiih an cangvai mi hin kan lung a ti tumruh sin ih hriamhrei thazang hmang ih mi palbeek tum ukhruainak cu doduh sinnak lungthin a suak sinsin. Kan neh hlan lo kan do ding” a ti.

Falam palik in mitthli tlak bomb an kap nakih hliamhma besia tuar cu an um lo tiah theih a si ih meithla an kap hnu ih kaihkhihmi minung 3 cu ralkap umnak vankau lam ah an phur so tiah theih a si.

Leave a Reply

Your email address will not be published. Required fields are marked *