Covid 19 ruangah Rihkhawdar Siizung an phit sung +Rihkhawdar dinhmun

Falam peng, Rihkhawdar ih Siizung hnaṭuan minung pathum in Covid 19 nat an nei ruangah Siizungpi an phit sung.

Rihkhawdar ah January 15 ah Covid 19 mina 5 an hmu ih mipathum cu Siizung ih hnaṭuan an si. Mipahnih cu tualsungmi an si.

“Siizung ih hnaṭuan lakah Covid 19 nat nei mipathum an um. Curuangah Siizung ih hnaṭuan midang 8 pawl khal rinhleh mina dinhmun in an khum cih ih Siizung khal Quarantine center dinhmun vekah hmang cih in an phit sung a si” tiah Rihkhawdar ih um mipakhat in a ti.

Siizung ih khum cihmi rinhleh mina 8 cu voikhat nat test nak an nei zo nan an negative thluh. January 20 ah voihnihnak an check sal dingih cumi ah nat an nei le neilo ti a ciang ding.

Rihkhawdar Siizung phit sung a si ruangah le Siizung hnaṭuan pawl tiang kharhkhum an si ruangah mina tuamhlawm tuding mi 5 cu Falam ihsin an thlah tiah theih a si.

Hih thuthawn pehpar in Falam Siibawipi Dr. Tluang Cung Thang cun “nathrik neitu pawl le siizung hnaṭuantu Q dinhmun ih um pawl cu siizung ah khaan dangdang te`n an um.”

“Anmah pawl a leeng ihsin a ṭulmi bomnak pawl pe dingah Falam ihsin mi 5 duty in kan ret. Thaisun (January 20) ah HQ ih um mi 10 pawl ih SWAB cu Tedim ah kan test sal ding” tiah CH a sim.

Rihkhawdar siizung cu zarh hnih sung lockdown hrih a si ih Ṭio khal zarh hnin sung Stay at Home dinhmun si dingin ṭuanvo neitu pawl in hmalaknak an nei a si.

Tuhrih tiangah Rihkhawdar ah Covid 19 nat nei miparuk an um zo ih mipakhat cu a dam zo ruangah Siizung in a suak zo a si.

Hram : Chinland Herald Daily News

Leave a Reply

Your email address will not be published. Required fields are marked *