Covid-19 positive thawn rak um tlaang dahtu Falam tlangval pahnih ih SWAB result a suak

Champhai ih Covid 19 nathrik positive ngahtu Pu Vai Thawng Lian (kum 56) thawn camkhat sung rak um tlaangmi, Falam, Hrang Ṭhio Bualrawn kiangih tlangval pahnih tei` SWAB result cu negative a si tiah Falam Hospital in an phuang a si.

Pu Vai Thawng Lian cu Falam mi a siih Champhai khua ih ummi a si. Febuary 2020 ah Falam ah a tlawng ih Hrangṭhio bualrawn kiangah a thleng.

Covid 19 boruak ruangah a umnak Champhai lam ah tlung thei loin Falam ah a taang lawk. Nan, remcang in June 23 ah a umnak Champhai lam pan in a poksuak thei ih Champhai a thlen veten India cozah thusuah vekin Quarantine an lutter. Cuih hmun ah test nak an nei ih Covid – 19 positive a si timi an hmusuak.

Cuih thuthang a suak veten Falam khua a um lai ah Covid 19 nathrik arak paai zo pangah tiin Covid – 19 Falam Committee in tawlrelnak an nei ih, Hrang Ṭhio Bualrawn kiang, a thlennak hmun ih rak riakpi dahtu tlangval pahnih cu Covid 19 test nak an nei mi a si.

Tu ahcu thinphang hngakhlap zet ih a result rak hngaktu Falam mipi le hmun tinkim ih um Chin miphun pawl cu SWAB result negative a si ruangah thin hnangam in an um a si.

Leave a Reply

Your email address will not be published. Required fields are marked *