CNLD pawl in, in Bo ih NLD in kan Bo ve – Pu Ngun Thawng

CNLD pawlin NLD soisel le puhnak pawl an nganmi a um ruangah simfiangnak ka ngan asi. An nganmi pawl cu screenshot in ka tarih 15 asi. A sangsang ten ka let.

1) CNLD mino hruaitu pawl in nld pawl an hro sawn. Kawrsen hruh pawl hitin lo ti ciamco ka duh tin an ke in lei an pal ciamco. Khua in kan lo dawi ding, nan duh le Airibual ah va um uh tin hro a tuartu cu NLD mino pawl sawn asi. Cinmual i nld poster signboard cnld t’antu in motor in a pahsiat nan a sim hman in sim duhlo. Mi in a tihrim asi ding an tinan kan mahte kan va tuahsal men.

2) CNLD Chairperson thu rel theiloin bike thawn an va hnaihnok timi a silo. Keimah khai sun (1-10-2020) ah ka um. Falam mino le T’io mino komin bike thawn khawsung vel i vahnak an tuah. Bazaar zinpi kapah meeting an rak tuahmi asi. Kannih party zungah kan tuah. Kannih cu commission i siannak thawn asi i kan theihnak ahcun cnld pawl commission ih siannak an lak ni cu 14-10-2020 i tuah ding asi. MP cuh pakhat pa tla cu cuvek siannak lak a t’ul mawsi ati i a vak ciamco. Kan zoh men.

3) Khawtin ah project tuahsak tiamkam nak hi a um lo. Khaw pawlin a t’ulsammi simnak cu an nei t’heu ko. Party pawlin in hriltlin le cumi ka tuah ding khami ka tuah dingtin thutum cu reldaan asi.CNLD pawl sawnin Falam khawlak zin hman kattaza phah thluh thei hrihlomi khawte tiang dum zerzerin kan lo phah sak thluh ding an ti sawn.

Kum 5 sung tuahmi hi siar cawklo asi. Surbung,Laiva,Vaar lilawn pathum lawng hman hi 47 billion asi i kum 50 sungih Falam hrang tuahmi hnakin a tam sawn. Khawte lam motor zin a pop thluh zo ih an lo zin tiang hman cehsak rero asi.

Tlawng tla hi a tamtuk. Lopil herloin um theinak dingah cangdawl lo tiang ti thei tawkin tuahsak asi. Hrilawk zik lawngih hun tuahmi a um cuanglo. Paisa ngahmi budget zirin tuah asi.

4) NLD khawbawi umnakah voter list lak timi hi commission hnat’uan asi ih party in laknak a um hi keimah vice chaiman ka si vekin ka theilo lawlaw. Falam commssion pawl mipi zumlonak a um thu theihnak pakhat hman a um lo.

5) NLD khawlal umnakah cnld le party dang covid puhmawh in campaign tuah an sianglo timi hi thuphan asi. Campaign caanah khawlal siloin commission thu an nei bik. Khua pakhat ah nld mino pawl feh dingin siannak kan la nan cui khua cnld khawlal in a rak awihlo sawn. Thuhla tam kan duhlo ruangah fehloin ka t’ul tir. Cui sun ah commission siannak um loin cnld mino an feh. Kan zoh men.

6) Party policy thu relbikmi asi. CNLD hruaitu thu rel ciamco ti hi kan vahnakah anmah in NLD, ASSK le Lian Luai an relse tuk tin in rak sim t’heumi asi sawn. Mahlemah kan si ruangah bulpak thu rel lo hi kan tumbikmi asi. Kan rel hman a t’ul lo. CNF in page 14 rori an nganmi hman kan zoh men. Thangsiat awk duh sisehla copy a thawng a thawngin tuah theih asi. Kan um men.

7) Facebook account lem tuahih ngantu hi party t’antu khatlam khatlam ah an um cio ko.

8) Vote pek tikah a thup i pek asi i zo in in pe pelo ti theih a theihlo. Mah vote pelotu khua khal rammi ansi ruangah thleidannak umloin nan tuahsak ding tin party hotu in ati vekih tuah asi. Kan dung term ah t’hansonak tuahsak dingmi pawl vote ngahzat cazin zohin ti a rak si. Kan nihin cuvek kan duhlo.

9) Chin nationalism n fehpimi ah poisaknak kan neilo. Ethnic nationalism fang asi tin kan hmu men. CNLD pawl sawnin Lai party t’anlo tu cu hnamhlo, miphun phatsan, sal lungput nei, Kawl sal, Kawlsal sinak khop theilo, Kawl tawliak, mi aa pawl tin mi an nautat ciamco mi hi siar cawklo.

10) Covid 19 bomnak hi rammi zovek hmuahhmuah hrang asi. Venglal khawlal pawl t’uanvo asi. An fel le fel lo thu asi. Cui pawl cu appointed siloin mipi hrilmi an si. Diklonak a um le report a theih ringring. Tulai ah cnld member si ruangih pek lo tivek hi vuanzichuk hman duhtawkin an report ngam rero zo ti hman theilo tui t’ongkam fang asi.

11) 2008 daanhrampi ih hrilawknakah hrilt’ul lo ralkap mp 166 an umcia. USDP hi 1993 kum ralkap sanih rak dinmi usda ihsin ra piang asi. Cuiruangah usdp in hrilawk hlanin mp 166 nei cia thawn a bangaw tin a rel theih timi cu usdp mp a
rak si dahtu Bullet Hla Shwe khalin a rel suak dah. Mipi t’iht’haih rero nak umloin 2008 daanhrampi simfiangnak neih sawn mi asi.

12) Pukmah 261 hi amah pakhatte lawng rem ding pawl asilo. 161, 262 tivek pawl thawn khaikhawmin rem ding ci package deal tuah ding asi. Culole elected lawng i CM hril ding tivekih rem ding pawl asi. Federal thoknak hram khal asi cuanglo. Kumziat ah remtheih asi ding ti cu rel theih asilonan daanhrampi hi upadi hnakin nainganzi piahtana sawn asi tiah an ti. Cui nainganzi piahtana relrem ahcun thaisun hmanih rem theih asi. Kum 20 kum 30 a t’ul lo.

13) CNLD cu ralkap an kop tin evidence umlo pi puh rero ti hi evidence hmuh thei lomi thudik thuhman tampi a um t’heu. Fala le tlangval an umtlang tin rinhlelnak cu a thuptei timi asi ruangah evidence a har nan falanu a pum a lang cun rak rinhlelnak cu a fiang vekin tu ahcun anmai sung rori ih t’ongsual pangnak pawlin a lang rero ko tin kan ruat.

14) Sinak le sumpai duhnak ruangah tin mai party silo pawl ti rero hi nainganzi ah democracy ih bulhrampi asimi bangawklo nak diversity timi hman cohlang duhlo, mahlemah sibik t’habik thiambik le ram le miphun duhdawtbik i ruat awtu midepde nun nei pawl sawn an si. Cnld pawlin Kawl party tin mi an do sawn.

15) Dinglai cozahin mipi hrangah ram le mipi paisa kha sumpai lam cin le daan vekin hman asi. Mipi vote hi lei i neh sisehla usdp pawl an rak sung duh ding maw? NLD in thudik thuhman rel in mipi vote ngah tum sawnmi asi. Harsa tukmi oltei tuah sak thei ding vekin, a cang theilomi hman cang thei ding vekin mipi sim rero tu hi zo an si sawn? Khawtin ih nld hotu pawl kan lei thluh mai ding a ti tu sawn hi ziang party an si? Kan sungkhat khawlal pakhat hman sumpai in an rak thlem. Zawi party an si pei?

Tampi a um lai an ti asile ngancawklo a um lai ve.

(Pu Ngun Thawng Facebook cahmai ta lak mi a si)

Leave a Reply

Your email address will not be published. Required fields are marked *