CNF Ke-kardan cun Chin Mipi Hiip thok

Dothlengnak ah kutzakai ih hmainor tlang dingin CNF in National Unity Government of Myanmar thawn ke kar tlang dingih thuthluknak a tuahmi cun Chin mipi a hiip zet.

“Tudinhmun ah kan duh khalah duhlo khalah CNF ih ke kar dan hi a fuh zet ti`n ka hmu.”

“Lailak cozah NUG hi rampumhuap mipi tamsawn ih thapekmi an si. Chinmi tamsawn khalin rampi cozah dik dinhmun in kan zoh so mi an si. Cupawl thawn hnaṭuan tlang dingih lungkim hminkhennak an nei cu a thu zawng khalin siseh hriamhrei keng in mipi thawn hmai kan nor ding ti thawn a bangaw” tiah rampi boruak thlirtu hminlang duhlo Chin upa pakhat in a ti.

Amah cun “Tuhlan khalah ram le miphun hrangah cangvaihnak an nei rero ko ding. Asinan, atuah rampi pakhat a simi Czech Republic rori`n Myanmar cozah dik dinhmun ih a pom zomi NUG cozah thawn ṭuantlang dingih lungkimnak an nei cu cangvaidan level an kai tinak a si. Hitiih thuthluknak an nei mi hin 2021 Dothlengnak ih dinthar ralkapbu pawl khal thazang an ngah zet ding tiah ruah a si” a ti.

NUG cozah le Chin ralkap CNF cun Federal Democracy hrambunmi rampi dinthei dingin ke kar tlang dingah hminkhen lungkimnak an nei zo thu May 29 ah an phuang.

Cumi thuphuan ah “ralkap ukhruainak (အာဏာရှင်စနစ်) dokalh dingin le Federal Democracy hrambunmi ukawknak nungsuakter dingin May 29 ah CNF le NUG lungkim hminkhennak neisuah a si” tiah an taar.

Cumi ah “khat le khat upat theithiamawton in ralkap ukhruainak do ding, thleidanawknak umlomi Federal Democracy hrang ah bangran ten kutzakai in hmainor tlang ding, culo thilthupi dang khal ṭuan tlang ding” tipawl a tel cih a si.

Leave a Reply

Your email address will not be published. Required fields are marked *