CNDF/CNO in Khuatlang mipi hrang a sangbik ralrinpeknak thu a suah

Mizoram ah Kawlram ihsin phurlutmi riit theih siivai nitin deuh thaw kaih mi a um ih cumi phurtu lakah Chin mi khal an tel.

Inntek Mizo kut ih kaih mi a si khal le thu felfai zirzoi a si tikah Kawlram ihsin phurlutmi ti a si tlangpi ih Kawlram raltlan par ah Mizo mipi an bei a dong zet thlang.

Curuangah riit theih siivai Mizoram ih phurlut cungcang ah CNO/CNDF cun a sangbik Khuatlang mipi ralrinpeknak cu a hnuailam bangtukin thu a suah a si.

Rittheihthil Le Thinlung Tidanglam Thei Siivai Ramri Kanih Phur Le Zuar Lo Dingin Nasa Takih Ralrinpeknak
July 20, 2022

Rittheihthil le thinlung tidanglam thei siivai pawl Myanmar ihsin Mizoram, India lamah phur le zuartu tam zet cu Mizoram Palik pawl in an kaih rero thu tuhrawng thuthang ah ningzakza zet kan hmu leuhleuh a si.

Kan ram buainak ruangah Chinmi pawl Mizoram ah raltlan in le Mizoram mipi pawl ih zawnruah lainatnak le duhdawt zetih in cohlannak cu remcang ah la tahrat in, mi duh-am, mai ṭanghma lawng sial ṭhenkhat cun Mozoram ah rittheihthil an phur le an zuar kan hmuh tikah CNO/CNDF telin Chin mipi pawl in mak kan tiih hleiah kan dodal in nasa takin kan dem a si.

Curuangah Chinram ihsin Mizoram, India ramri kanin rittheihthil phurih zuar nawn lo lawlaw dingin le hi thusuah thlun lotu cu CNO/CNDF in nasa takih hremnak pek an si ding thu ralrinnak sangbik kan pe a si.

Chin National Organization/Chin National Defense Force

Siarbet : CNDF le ralhraang doawknak thusuah : July 20

Chin ramkulh, Falam hrambun CNDF le ralhraang ralkap doawknak thu cu Chin National Organization in July 20 ah thu felfai an suah.

Thusuah cu June thlacem le July thlathok, Kalay-Falam-Hakha zinpi doawknak thu pawl a si ih, doawknak ah ralhraang ralkap 40 lenglo an thi ti`n tarlang a si.

Ralhraang ralkap hi mawṭaw 30 hrawng le mipum thazang 200 hrawng thawn an si ih June 30 ah Kalay ihsin Falam lam ah kai so in, lamzin ah ralkap 50 hrawng an ṭhum.

Cupawlcun khawmi innzuat ṭilva le Loram thlaihnah pawl fir in duh tawkin nuam an ceen.

Culai ah ralhraang ralkap in Falam peng, Valung khuami, kum 63, hawirianlo mipakhat cu June 30 ah kap that in, July 2 ah Hlanzawl khua ih midamlo pakhat cu kutdunglet ṭawn in an hnuk ih rapthlak zetin an that tiah CNO thusuah ah tarlang a si.

Ralhraang ralkap pawl Falam an thlen hlan, June 4,5,7 pawl ah lamlak ihsin CNDF ralkap pawl in an do ih, voithum kahdonak ah ralhraang 5 hrawng thi in, CNDF lam ah natuklo hriam tuar pakhat a um.

Ralhraang ralkap pawl Falam an thleng hnu, July 7 ah Hakha lam pan in mawṭaw 27 le mipum thazang 200 hrawng thawn an poksuak hnu, pengban 10,13,24 pawl ah CNDF, CNA, CDF le CJDC special force ralkap pawl in July 8 ihsin 11 tiang, ni 4 sung an do ih doawknak ah ralhraang ralkap 40 hrawng an thi ti`n CNO cun thusuahmi ah a tarlang tel.

Cuhnu ah CJDC special force ralkap pawl in July 16 tiang ralhraang ralkap an do bet ih, doawknak ah mipi ralkap hriam tuar 14 um in, mipakhat in ram le miphun hrang nunnak a hlan a si.

Siarbet : CJDC Special Force raldozir ṭumkhatnak ṭheh suak

Chin ralkap komkhawmpi CJDC Special Force raldozir ṭumkhatnak cu July 19 ah an ṭheh suak thei ti`n thuthang kan ngah.

Thlakhat sung raldo zirnak ah mipum 100 luan an tel ih, a thu zawngin ni 15 zirhawknak a um hnu ah ni 15 sung cu atakin cangvaihnak an nei tiah theih a si.

“Special Force training ṭhehsuak pawl cu hmun 2 in ṭhen an si ih, a ṭul caan ah raldonak ah tel thei dingin ralringter cia an si. Tuṭum raldo zirnak ah a tel thei lomi CJDC sungtel khal an um ih, cumi sung in ṭumhnihnak raldo zirnak ah a tel leh ding an um” tiah CJDC ṭuanvonei mipakhat in a rel.

Special Force training kaitu Chin ralkap ṭhenkhat cu tuṭum Falam-Hakha zinpi doawknak ah an tel ve ih, cumi sungin CDF-Matupi ralkap pakhat in ram le miphun hrang nunnak an hlan.

Chin ralkap komkhawmpi Chinland Joint Defense Committee ah ralkapbu/pawlkom 18 an tel a si.

Leave a Reply

Your email address will not be published. Required fields are marked *