CNDF cangvainak par ah Chin mipi Diriam zet

Falam khawsung inn khaang tumtu kaihkhih an si thu ah Chin ralkap CNO/CNDF in thuhla felfai zirzoi in sual tuahtu mi 3 pawl, mi khua mi ram ah an va kai thei cu leitlunhuap Chin mipi an diriam zet.

March 5, zaan nazi 9 hrawngah Falam khawlaili inn urkaang tumtu an um ih, cuih zaan ihsin thok tualsungum mipi cu zaan an it thaw thei nawn lo.

“March 5 zaan ah Bazaar Kimpu inn le Ko Htun tei` inn datsi theh in an ur nan a phar lawng a kaang. Mei an phal man.”

“St.John kiang Pu Lian Tin Hre tei` datsi dawr an ur tum bet ih datsi pung hril awn an thei ih an va zoh cu mawṭaw cycle pakhat thawn mi 3 an tlan lai an hmu. Thei man loin rak kaang sehla cu …. ruah ngam a si lo” tiah tualsungum mipakhat cun a rel ih “khai zaan ah keimah telin lungfimcin upa cu it that thei an mal ding” tiah a ti.

Culaiah, March 6 zingah Falam thawn a hlat tuklonak Laimual thlen hlan ah inn pakhat a kaang. Cubetah cuih zaan thotho ah Tlanglo veng, Lampa ih inn 3 cu rinhleh um zetin a kaang.

(March 6 thotho ah Congṭhe khua ah hmaituam mi 3 in thingtan keng in inn pakhat an deng. Inn neitu pitar cu na rel ciitceet cun kan lo that ding an ti tiah tualsungum pawl cun an rel)

Cuvek boruak ah zaan ih vengtin duty tuding security group an rak din man phah nan, Falam khawpi siatsuahtumtu atakih kaihkhih an si hlan sung cu thin thi in kan it thei lo tiah tualsungum pawl in an rel.

CNDF in Falam inn khaang tumtu an kai thu an phuang

CNDF in thuhla felfai a zirzoi hnu ah Falam inn khaang tum tiih hmuhsuahmi Biak Ceu Lal, Ceu Lian Hum le Sang Lian te` 3 cu Mizoram ah an kai.

March 9 ah Biak Ceu Lal le Ceu Lian Hum cu Mizoram, Aizawl khawpi ah an kai ih, Sang Lian cu March 11 ah Mizoram, Zokhawthar khua ah kai ngah an si thu, CNO/CNDF in March 13 ah mipi an sim thei.

“CCTV zuk ngah mi le a hmutu pawl sim vekin CNO/CNDF in zirzoinak kan nei ih, an 3 cangvaihnak a si ti kan hmusuak ruangah kan kai a si. Atu ah CNDF Thawnginn ah kan khum sung ih, Lampa inn 3 urkaangtu an si le silo, zirzoinak nei bet vivo in kan phorh suak ding” tiah CNO/CNDF cun mipi an sim thei.

CNDF cangvaihnak par ah Chin mipi Diriam zet

CNDF in Falam innkhaang tumtu mi 3 an kai thu an phuang hlan ah, India-Myanmar ramri kiltu လဝက zung hnaṭuan pawl in mipi ta an lak sak mi မှတ်ပုံတင် pawl, an kut ah a um thu le a neitu pawl in hlam saal a theih thu mipi an sim thei.

Cuhleiah Falam mipi thlaphang tertu mi 3 an kai zo thu an phuang bet cu atakin mipi hrang hna an ṭuan nak an langter a si ti`n Chin mipi pawl CNDF cangvaihnak par ah an diriam zet a si.

Leave a Reply

Your email address will not be published. Required fields are marked *