CNA spokesperson Salai Htet Ni rel mi Falam peng doawknak

Chin ramkulh, Falam peng, Ramthlo le Tlangzar karlak doawknak ah ralhraang ralkap amalbik 11 an thi ti`n CNA spokesperson Salai Htet Ni in Mizzima hnen ah a sim.

“Bomb kam puak kuai mi le kahdonak ah ralhraang ralkap 11 an thi ti cu kan nemhnget thei. Bomb puak mi in ralhraang tampi a hnawr ih cipciar in cu kan thei lo. Cuhnakin an tam khal a si thei” tiah CNA spokesperson Salai Htet Ni cun a rel.

July 10 doawknak thu a rel mi a si ih ralhraang ralkap an tuar na rualin Chin ralkap lam ah natuklo hrim tuar 4 an um nan doawknak ah an tel pehzom thei tikhalin amahcun a rel bet hrih.

Ralhraang ralkap hi mawṭaw 28 hrawng thawn an si ih, mawṭaw 4 ah hnaṭuannak bungrua phurin, hmailam ah Ke ih feh mi ralhraang ralkap 40 hrawng telin an zaten mipum 120 hrawng an si ding ah ruah a si.

Mizaan ah Ramthlo ah an riak ih, tuni July 11 zinglam nazi 4 hrawng ah Ramthlo tlunlam ih umhmun an khuarnak hmun ah mipi ralkap pawl in an kap ih mithi um zat cu theih a si lo.

Ralhraang ralkap hi Thlanrawn le Ṭaal kiang khalah mipi ralkap thawn an kapaw zo ih cuih ṭum ah ralhraang ralkap 20 lenglo an thi tiah theih a si.

Tuni July 11 khalah Ramthlo le Dokthek karlak ah doawknak a um ih thuhla cipciar theih fiang a si hrih lo.

Nemhnget hrihlomi thuthang pawl ah ralhraang ralkap lam an tuar na ti a si ih mipi ralkap lam khalah ram le miphun hrang nunnak hlantu an um. Asinan Chin ralkap pawl in thuhla cipciar an suah hrih lo.

Leave a Reply

Your email address will not be published. Required fields are marked *