CNA in Min Aung Hlaing sawmnak a cohlang le hlanglo thu relfiang

April 22 ah ralhraangbawi Min Aung Hlaing in remdaihnak hrang thureltlang dingin Tlangpar hriamkai pawl a sawm hai.

May 9 tiang caan a pe ih pawlkom 1 ah mi 2 fingfing sawmin amah bulpak rori thawn tongaw dingin a tiamkam hai.

Ralhraang sawmnak cohlangtu hriamkai pawlkom ṭhenkhat an um ti`n thuthang a suak ih cupawl lakah CNA an telve ti`n internet cahmai ah thuthang ngan mi a um.

Cuih thuthawn pehparin Khonumthung in CNA spokesperson Salai HtetNi an sut ciangih amahcun hitin a rel.

“Hmaisabik ah atu rampi buainak cu SAC ralkap le Tlangpar hriamkai thawn lawng a pehparmi a si lo. Kan mah pawl le SAC biakremaw ih daiter theimi buainak khal a si lo.”

“SAC tawthawhmi buainak cu mipi thawn khal a peh aw zo. Rampumhuap mipi le SAC ralkap karlak buainakpi a si zo ih, remdaihnak tuah ding in sawm mi thu ah kan nih CNA in ziang thu hman kan rel hrih lo” tiah CNA spokesperson Salai HtetNi cun a ti.

SAC ralhraang sawmnak par ah ziangtikah thuhla rel an tum tivek cu felfaiten a rel lo nan amah bulpak hmuh dan cu hitin a rel ve.

“Kan nih Tlangpar hriamkai pawl siseh, mipi ralkap pawl khal SAC ralhraang nor hlo ding hi kan hmuitinmi a si tikah ralhraang sawmnak par ah ruat ṭhat ding ziang hman a um lo.”

“Kan zawh mi zin ah ding hnget in lungrualten kutzakaitlang a ṭul. Ralhraang sawmnak thu ah zianghman ruat ṭhat hran a ṭul lo ih kan din cia mi ah hnget zetin kan ding a ṭul ti`n ka sim duh” tiah CNA spokesperson Salai HtetNi cun a ti.

Leave a Reply

Your email address will not be published. Required fields are marked *