CM Pu Salai Lian Luai cu a Inn suahsan dingin Thupek a si zo

Sr. Gen Min Aung Hlaing hohami Myanmar ralkap in rampi thuneihnak a laak hnu a nihnihnak tiangah ramsung Ukawdan tamzet a thleng zo.

Union Minister (ပြည်ထောင်စုဝန်ကြီး) thar 11 a laak ih Deputy Minister 24 (ပြည်ထောင်စုဒုတိယဝန်ကြီး) cu hnaṭuan a ban hai.

Ramkulh, Pengṭhen cozah ṭuanvonei mithupi deuh pawl cu hmun phunphun ah a kilkhawi sungih a thlah sal mi khal an um zo.

NLD cozah ṭuanvonei a thlah sal mi khal cu a hmin men lawng in a si ih innleng suakvaklo dingin mah le inn cio ah a kharhkhum hai.

Cumi lakah kan nih Chinram cozah lubik ṭhenkhat khal Hakha ralkap/palik sakhaan ah kilkhawi sungin an um ih, atu dinhmun tiang kan theih sun ah Hakha ih an kilkhawi sungmi CM Pu Salai Lian Luai telin Chinram Minister 5 cu an mah le inn cio ah tluntersal an si zo.

Ralkap i kilkhawi tuar thuthawn pehparin tuizing ih an tluntermi CM Pu Salai Lian Luai cun thuhla simfiangnak a nei hrih lo nan mizaan lam ih an tluntermi Minister Pu Sui Ṭhio cun “2020 rampi hrilawknak ih vote diklo an timi thuhla kha a sibik. Cumi ruangah ralkap in rampi thuneihnak a lak tiah in sim ih in thlah hlan ah inn lam ah daiten um dingin in cah ta” a ti.

Tuhrihtiang cu Chinram hruaitu dingah ralkap in zo a ret ding timi a ciang hrih lo nan Chief Minister Pu Salai Lian Luai le Minister dangdang pawl cu a tu an umnak inn in a tlaibik February 5 ah suak tengteng dingin ralkap in thu an suah tiah theih a si.

Hih thuthawn pehpar in Falam khuasungum upa pakhat cun “ralkap in thuneihnak a lak zo tikah kan nih Chinram cozah hruaitu pawl khalin ralkap thusuah thlun hrih lobak cu titheimi a um hrih lo. Atu ah CM Pu Salai Lian Luai telin Chinram Minister dangdang cu February 5 khi ninetabik ah ret in an umnak cozah inn suahsan an fial tiah thuthang kan thei. Ziangvek dinhmun kan thleng ding ti cu rauh ban khal a si lo” tiah FOM hnen ah a sim.

Leave a Reply

Your email address will not be published. Required fields are marked *

error: hahahahahaha !!