Chinram zaṭek 75 cu kan kut ah a um zo – CNA/F Spokesperson Salai Htet Ni

CNA/F Spokesperson Salai Htet Ni cun atu dinhmun ah Chinram ukhruaiawknak zaṭek 75 hrawng cu kan kut ah a um zo a ti.

Mizaan, March 2 ih thlah mi Irrawaddy thusutnak a let saal mi ah tarlang a si ih “an nih SAC ralhraang cu Chin ramkulh khawpi 9, khawpisung pawl lawngah ukhruainaknung an ser thei” a ti.

A rei hlan ah SAC ralhraang in Chinram hmunram a nor ding zum a um thu, thuthang a suak ih cuih thu thawn pehpar in atufang Chinram dinhmun siseh, doawknak thu le hmunram ziangzatcin nan la thei zo tivek cu Irrawaddy in Salai Htet Ni an sut.

Atufang Chinram kahdo thu an sut mi ah “Chinram myone 9 um mi ah doawknak fate a um fingfing. Abikin Matupi, cule myone dang pawl ah ti`n doawknak a um. Doawknak picang cu a um lo. Nan, hmunram ukhruaiding timi thulu thawn doawknak hrang timlamnak an nei timi cu kan thei” tiah Salai Htet Ni cun a ti.

Ramkulh ukhruainak thu thawn pehpar in “an nih SAC ralhraang ukhruainak cu khawpisung pawl lawngah an ser thei. Ralkaplam zawngin cu an cangvai rero ko. Nan, cozahzung tivek cu a hlan vekin a nung lo. 100 ah 30 hrawnglawng an ti nung thei. Cozah hnaṭuan khal nazi 10 in 12 tiang zungkai, tlungsaal ti`n an khawsa. Ukhruai thupek dingin hnaṭuantu an um nawn lo ih ti theih mi an nei lo. Khawpi himveknak tivek lawng an cangvai thei” tiah Salai Htet Ni cun a ti.

Ralhraangbawi Min Aung Hlaing in rampi ukhruai thuneihnak a la hnu, Chinram khawpi (saklam) pan in ralhraang hlom voi 2 a thlah zo ih ṭumkhatnak cu kan dung kum ah a si.

Ṭumhnihnak a thlah mi cu atufang Falam-Hakha ziinpi ah an tanglai tiah theih a si ih hriamkai ṭangrual pawl thawn lampi ah an kapaw phah vivo tiah kan thei.

Leave a Reply

Your email address will not be published. Required fields are marked *