Chinram SAC ralhraang ca thupi a puut darh

Thlapau dothlengnak ah Chinram ih nasabik doawknak a suak hmasabik ṭum, Mindat golf thawinak hmun ih SAC ralhraang sunralnak ca thupi pawl cu online ah a puut darh.

Chinram doawknak a suak hmasalam a si vekin ram le miphun humtu CDF pawl cun hriamhrei ralthuamṭha nei lo cingin Lai meithal rori thawn SAC ralhraang an do thok a si.

Cuih ṭum doawknak thu thawn pehpar mi ralhraang ca thupi a puut darh mivek asile doawknak ah rank sang ralkap 3 le rank niam ralkap 9 an thi ti a si.

Cuhleiah meithal ralthuam an sun mi cazin pawl cu ca puut darh mi ah cipciar zetin an tarlang.

Hih thu thawn pehparin Mindat khawhnar doawknak ih telvetu CDF ralkap pakhat cun hitin a rel.

SAC ralhraang ca thupi a puut darh mi kim ciangin na zoh duh le hinah hmet — The Mindat Post

“Ca puut darh mi ai in atakih ralhraang sunralnak pawl a nasa sawn. Simduhsan cu amal zawngin an ngan lam. Mawṭaw siatsuahthu khal an ngan tel lo. Atak ahcun ralthuam phunphun kan lak hnu ah ralhraang mawṭaw 6 hnakih mallo kan urkaang.”

“Mithi um zat cu a dik men thei. Kan nih khalin ralhraang rank sang an thi tam thu cu hih ca a puut darh hnu lawngah kan thei ve” tiah Ralhraang SAC ralkap 10 luan an thi mi thu thawn pehparin CDF ralkap pakhat cun a rel.

SAC ralhraang ca thupi a puut darh mi cu The Mindat Post in online internet cahmai ah a theh darh mi a si ih “ralhraang an tuar na ruangah remdaihnak tuah dingin CDF pawl an bia. Cuhleiah meithal ralthuam lak sak mi pawl ap saal dingin a thupten CDF an pehtlaih” tiah an tarlang.

Leave a Reply

Your email address will not be published. Required fields are marked *