Chinram cozah in Surbung Vanzam tualrawn onpuai thu ah thuthannak nei

October thla sung ih Falam, Surbung Vanzam tualrawn onpuai timlamnak tuah tum mi cu Covid 19 boruak ruangah remcang sal lo in on ding ni le thla ṭhulhsal a si thu theih a si.

Hih thu ah, Minister Pu Sui Ṭhio cun,”a hlan ih kan rak tumnak ahcu October thla ah on ding ti a sinan Covid 19 boruak voihnihnak a thlensal ruangah kan ṭhulh sal. Ziangtik ah onnak nei ding ti cu Cozah lam in thannak kan nei leh ding” tiah The Hakha Post hnen ah a sim.

Kan dung zarh lam ah Chin ramkulh cozah ṭuanvonei Minister Pu Soe Htet in Surbung Vanzam tualrawn cu October thla sung ah onpuai tuah tum a si thu le nikhua sia ruangah October 1 ih Vanzam ṭum ter sin tum mi khal ṭhulhsal a si thu a rak phuang dah ih, tu ah, Minister Pu Sui Ṭhio in Covid 19 boruak ruangah onpuai tuah ding ni le thla a ciang lo thu simthannak a nei sal mi a si.

Tufang Falam Surbung Vanzam tualrawn cu zaṭek 98% tluk ṭheh suak a si zo ih Vanzam ṭum so nak ah hnaihnoknak suakter theitu tlangbo pahnih khal ṭhiatbal fel a si zo.

Tuahcun Covid 19 boruak dai/cem deuh tikih onpuai tuah ding le hmaisabiknak Vanzam ṭum ter sin ding lawng a hmabak a si.

via CH daily news

Leave a Reply

Your email address will not be published. Required fields are marked *