Chinram Amyotha Hluttaw no 4 sinak ka Co le – Salai Nhgepi Thian Uk Thang

Ka hmin cu Salai Nhgepi Thian Uk Thang a siih CNLD party ihsin Chin ramkulh Amyotha hluttaw hrilfung number 4 ah zuamtuding ka si.

Falam khua suak, Falam ih ṭhanglian mi ka si ih, a tu hi Journalist thuthang cangan dinhmun in pumcawm rero mi ka si.

Santhar hrilawknak a simi 2010 rampi hrilawnak ihsin, election khawvel ah ka tlangleng thok. Culai ahcun kum 27 hrawng ka si ih Pyithu Hluttaw ah ka rak lut nan ka hlawh tling lo.

Kum 2015 khal ah CNDP timi Chin party pakhat thotho in Pyine hluttaw in ka rak zuam ve nan ka hlawh tling lo.

Atu hi, a voithumnak zuamawnak ih telsalding ka si tikah mipi pawl ih thapeknak, tuhlan hnakin ka beisei zet. Ahlan ih in dinpitu pawl par khal ah lungawithu ka sim duh ih, tuṭum a voithumnak ah hin in bawm cio hram dingin zangfah ka lo dil hai duh.

Atu ka dinnak ding Amyotha hluttaw timi cu 2008 Daanhrampi ih in pek mi vek a si le state and division timi Pyine le Taìñ pawl bangranten, 12 ciar kan ngahnak hmunhma a siih Chin ramkulh in 12 kan co ve mi a si.

Atlangpi thu in ramhrin miphun pawl ih covo pawl ngahsuah theinakding hrangah a zuam ding mi hluttaw phun a si.

Amyotha le Pyithu hluttaw ti`n Naypyidaw ah phun hnih a um mi sungah Amyotha hluttaw cu ramhrin miphun pawl thawn a pehpar deuh mi a si.

Ramhrin miphun thawn pehpar a simi Chin miphun nunphung thu, leiram thu, biaknak thu, mimal sawn pawl ih pianvo thu relkhawm nakding Tlanginnpi a si ih, cuih hmun, Amyotha hluttaw ah zuamtuding ka si.

Ka tlin a si ahcun kan laica thuhla pawl, kan Lai calai thuhla pawl, Nunphung thuhla pawl tampi phurson ṭhansoter dingah ka zuam ding.

Ziangah, hiti vekin Calai thuhla lam ah hin nasa zetin ka zuampi thei ding, ka ṭanpi thei ding tiah ka sim a si ahcun, Tufang ka hnaṭuan rengreng khal hi Chinland Herald nitin thuthang ca ah hin editor dinhmun thawn thuthang ca suah rero ka si ih Falam Community Media timi Falam radio FM awthlahnak ah teimak suah in ṭuan rero tu pakhat khal ka si.

Cutivekin kan mai` miphun in kan mai` miphun ṭong le ca, thu le hla thawn kan silh khah aw thei tik lawngah bulpak pakhat cio ah kan nunram tla hin sullam nei mi nunram a si ding ti`n kan zum, kan ruah san mi a si.

Kan leiram thuhla khal ah rampi ih Daan neih mi le kan nunphung ih neih mi Daan thawn a milaw lo. Hman dingah kan nuntu khawsakdan thawn a remaw lo mi pawl ro a rel tuding hi Amyotha hluttaw thotho a si.

Curuangah kei hi Amyotha hluttaw ih miphun pianvo pawl, ramhrin miphun pawl ih thuhla relkhawm nakding Amyotha hluttaw ka hril duhnak a si.

Tahṭhim nakah, Chin mi zate huap mi nunphung puai pi tivek, phorhsuah ding thuhla, Chin calai pawl Tlawnginn ih ṭha zetih zir thei, fumfe zetin kan fanau pawl ih thluak ṭhansoter nakding tiang ih a va ṭangkai dingmi thuhla pawl, ramhrin miphun pianvo pawl, cumi pawl hi Amyotha hluttaw timi ramhrin miphun pawl ih Tlanginnpi sung ahhin Au theinak ding hrang ah tiimlaamnak khal ka nei, saduhthat mi tawkfang khal ka nei ih November 8 ni, vote kan thlak tikcu ah Siaki par ah Vapual nupate an fu lai mi zuk par ih Salai Nhgepi Thian Uk Thang, kei mah tla kha hngilhloten in dinpi cio hram ding ah zangfahnak thawn ka lo sawm duh.

Video transcript via Kabia Saya FB

Leave a Reply

Your email address will not be published. Required fields are marked *