Chinmi ralkap tlan le Palik tlan mi 4 in an hmuh ton mi pawl an relsuak thluh

Kawl ralkap in February 1 ih Myanmar kumpi cozah thuneihnak a la hnu ah ralkap ukhruainak hnuai ih hnaṭuan duhlo palik, ralkap le cozah hnaṭuan pawl ramdang ih tlanlut an tamzet.

Cumi ah Chinmi khal an tam zet ih raltlan dinhmun in ramdang ih tlanlut cozah hnaṭuan Chinmi tamsawn cu Mizoram ah an tlan.

Ralkap pawl in Tonzang ih civil disobedience movement (CDM) teltu in thlingthla ter – Kunga

Kum 24 mi Kunga cu Kawl ralkap rank niam a siih ralkap/palik bawi pawl ih fialmi a tuah theilo/duhlo ruangah raltlan dinhmun in India ram ih tlanlut a si.

Chinram a suahsan hnu March 7 ah India ramri a thleng. An khua in bike thawn a tlansuak ih khuate pakhat ah a bike cu a tanta. Cuhnu ah Ke thawn nihnih sung a tlan ih an khua a suahsan hnu ni 4 nakah India ramri a thleng hi a si.

Kunga cun “Tongzang khua ih CDM teltu le an thuhla cipciar cu ralkap pawl in in thlingthla ter. Cumi thupeknak thlun duhlo/tuah duhlo in India ram ah ka tlanlut hi a si” a ti.

Kunga cun Aljazeera media palai hneh ah a ralkap sinak ID a hmuh hnu ah “Ralkap le palik pawl in dai zetih duhphorhnak neitu mipi an kap ciamco hi ka ninghang tuk rori. A kaptu pawl hi innsang nei cio an si ve ding sikhawh? ziangtinsi zangfah lainatnak neiloin innsang neive mipi pawl cu meithal thawn an kap ciamco thei” a ti.

Tantami sungkhat unau pawl an him lo

Kunga cun “India ram ka thleng hnu ah kan khua ih ka tanta mi kapa an kai ti thu ka thei. Amah hi kum 63 mi lettama a siih, tuah ziangvek dinhmun a si tikhal ka thei lo. Phone ka duh zet nan zohman ka call ngam lo. Ka pehtleih mi hmuahhmuah cu an kai ṭheh ding. Curuangah zohman ka call ngam lo” a ti.

India ram ih tlanlut kum 30 mi Tedim palik Marli khalin a pasal paliktlan Vankung (kum 29) kut kai phah in “duhphorhnak neitu mipi kan kai duhlo ruangah ka pasal thawn India ram ah kan tlan.” a ti.

India Federal home ministry in ramkulh cozah thuneitu hnen ah India ram ih tlanlutmi Myanmar raltlan pawl i cungcang fiangfai zet i zingzoi dingin le kuat kir sal ding dan a tawlrel dah ih cumi thuthawn pehpar in Tedim paliktlan Marli cun “a cang suak ngaingai men thei. In kuat tum sal a si ahcun a hrial danding kan ngaihtuah tum” a ti.

Vankung khalin “Duhphorhnak tuahtu mipi an suak veten tlunlam bawi upa pawl in kai dingin in fial” tiah a sim.

Tedim Palik tlan nupate cu ralkap le palik bawi upa pawl ih thupeknak thlun duhlo ruangah an pumcawmnak hnaṭuan rori tansan in ramdang ih tlanlutmi an siih March 14 ah Mizoram khua pakhat ah beunak hawl i thlengmi an si.

March 9 ah palik dang rualpi pawl thawn India ram lam pan ih tlantu Tedim police constable Suan cun “Kan mipi pawl hi ka duhdawt zet hai. Curuangah ka duhdawt mi mipi hremtu ralkap cozah tlansan in Mizoram ah ka tlan hi a si” a ti.

Anih hi kum 2 mi naute le a nupi tansan in India ram ih beunak hawltu Tedim palik a si ih an khua a suahsan hnu ah a sungte pawl voikhat lawng a biak hai. Cukhalcu hramhram in a call mi a si. A phone hai ṭheu a si le a sung le pawl in an tuar ding ti a thei ciang ruangah seherh cingten a call ngam nawn lo.

“Ka nupi hnen ah ka sim. Democratic government a dingsuah sal lo cun ziangtik tiang Mizoram ah ka beu ṭul ding ti hi ka rel thei lo ti`n ka sim. Tuvek dinhmun ih kan ram kir sal ding cu a ṭihnung tuk” tiah Suan cun a ti.

India ram hi United Nations Refugee Convention ah lungkimtlangnak hminkartu ram a si lo ruangah Refugees policy phungdan neilomi ram a si. Tuhlan ih India ram ih tlanlut Myanmar raltlan tamzet cu UN refugee agency UNHCR humhimnak hnuai ah Delhi ih ummi an tam.

Tuṭum Myanmar ram buainak ruangih India ram ih tlanluttu Myanmar raltlan pawl hi India cozahpi in Refugees dinhmun in a pom ding le dinglo thufelfai a um hrihlo. Center lam cun United Nations Refugee Convention ah lungkimtlangnak hminkartu ram an si lo mi khihhmuh in Myanmar ramri ih um Mizoram, Nagaland, Manipur le Arunachal Pradesh cozah pawl cun raltlan cohlang theinak thuneihnak nan neilo tiah thuthannak an nei.

Myanmar ralkap tlan kunga cun “India ram hin UN refugee agency humhimnak huai ah raltlan dinhmun i in pom a si le hih hmun ah ka sungte pawl ka hruai hai ding ih a remcan dandan in ka umpi hai ding” tiah Aljazeera hnen ah a sim ih, a umnak kiang ih Tlangsang cuan phah in “India cozah in Myanmar ah in kuat kir sal ahcun Thihnak khursung ih vunglut salvek a si ding” a ti.

Ralkap le palik tlan Kunga, Suan, Vankung le Marli te nupa pawl cu Mizoram khua pakhat ih beunak hawltu Myanmar raltlan 25 hrawng thawn innsak laimi hall pakhat ah an um tlang ih khuami pawl bawmnak thawn a rem cancan dan ih khawsa an si.

Hminsin : An hmin pawl hi hmin lem hman sak an si …..

Leave a Reply

Your email address will not be published. Required fields are marked *