Chinmi Humhimnak hrang ah Mizoram in Sangka Ong Sak

Kawl ralkap in rampi cozah thuneihnak a la hnu ramkhel thubuai ruangah Myanmar ihsin India ram ih va beu duhtu cu Mizoram cozah in sangka a ongsak thu a rak phuang zo ih, tukhalah Mizoram, Champhai Ṭhalai Pawlkom in Chinmi hrang ah theitawk suahin bawmding a man ringring thu, ca in an suah a si.

Champhai Ṭhalai Pawlkom zung cun “Kan unau le kan thisen zompi Myanmar ram ih um zate hnenah, a hmaisa in Champhai Thalai Pawl, Mizoram in nan kut kan lo kai. Tulai Myanmar ralkap cangvaihdan kan rak thei ih kan unau Chinmi pawl khal harsatnak phunphun nan tuar tiah kan rak thei cu poi kan tizet.”

“Ram dangdang ah um hmanningla nan tuarnak in kan thinlung le ruahnak nasaten a luahkhat. Ziangvek dinhmun thleng hman uh la thinphang in um hlah uh. Nan unau pawl Mizoram ah kan um timi thei ringring uh. Champhai Ṭhalai Pawl in nan hrang tithei kan neih ahcun nanmah bawm dingah kan man ringring timi in rak theisak hram uh” tiah official in ca an suah a si.

Kawl ralkap in Myanmar cozah thuneihnak a lak pekte khalah Mizoram sungih thazang a cak zetmi Mizo Tlawngta Pawlkom cun Myanmar ralkap dem in February 3 ah Aizawl khawlipi ah duhphorhnak an rak nei zo a si.

Cuih duhphorhnak ah Mizoram sungih atufang nehnak co party le dokalh party ih hotu pawl khal an tel ih Kawl ralkap ih uknak lakmi an duhlo thu le ramkhel thubuai ruangih raltlan pawl khal Mizoram in a cohlang dingthu an rak phuang dah a si.

Leave a Reply

Your email address will not be published. Required fields are marked *