Chinmi Hruaitu dingah zovek na hril ding! – Philip Van Lal Lian

Ziangkim hi kaihhruaiawknak thawngin a tlasia ih tundin khal a si ve” ti mi kaihhruaiawknak țongkam hi el theih rual lo ih diknak nei a si. Kaihhruaiawknak cu hruaitu in a ra. Hruaitu a um lo le kaihhruaiawknak khal a um ve lo.

Tumtah le fehduhdan a va ţha zet hmanah hruaitu le ţuansuaktu kan ţul. Curuangah, Chimmi hruaitu ding kan hril ding ahcun a tanglam ih tar mi tlinnak tel khi cu a bih thiam rori a ţul.

1. Nuhrin_Cahnak/Nehnak: Nuhrinzia hi Pathian in cahnak danglam zet a sersiammi milai hnenih in pek mi a si ruangah kan hril ding mi … ih a zatlang nun hi duhnung a tling maw ti zingzawi a țul. Biaknel um a si maw? Mipi lakih tlanlen nuam a ti maw? Mipi lakih tlang paih lotu cun mipi ngainatnak a nei ngai thei lo dingih mipi sinak/zonzaihnak in ţawmpi thei lo vio ding.

A mizia hi “hngalnak lole nunneemnak in a uk maw?” ti mi kan bih fuh le ziangtin in kaihruai ding ti cu a fiang nasa ko. “Pianpi thluak teh a nei ţha ko maw? Cat loin thil a zir paihtu teh a si maw?” tivek khal zingzawi thiam a ţha. Pianpi ziaza thleng a theih lo ti hi hngilh lo a ţha.

2. Thuanthu_Cahnak/Nehnak: Mipi lakih tlangleng theiih a um hnu ah ziang hna a ţuanah a sinak a lang? Ziangvek hrangih pumpekawk a rak si? A rak pekawknak kha a thiang ko maw? A thuanthu tamsawn in amah mimal hlawknak maw mi pi hlawknak a suahpi deuh? Hnațuanpi ding ah amah hnampi lawng maw a hril țheu? Hipawl hi sut lo a theih lo.

Ziangah tile, Khristian rawngbawlnak hmanah bumawknak a tam cun ramthukhelnak sung sinsin ahcu ziaza remawk tum hnakin thuphanper le bum tumnak hi nunpi a sisawn ţheu mawle.

3. Nuncan_Ziaza Cahnak/Nehnak: A nuncan ziaza in mi a hip ko maw? Cat loih a nunpi mi ziaza cahnakpawl teh ziangpawl an si? A nuncan ziaza ka rinsan ngam ngaingai ko maw? Thlengawk awltukmi a si maw? Nuam atizawng teh ziangpawl an si? Hi pa hril ngaingai sehla ziangvek pekawknak thawn Chinram hrangah a ţuan pei?

Hipawl sut hnu ahcun tampi na fiang ka zum. Party atcilh hnakin party aiawhtu hi hniksak ding a si sawn. Party aiawhtu in party a nunpi ding. Party in ţuansuaktupawl ai a awh thei lo. Party cu hmin men a si sawn.

4. Fimthiamnak_le_Țong: Ram hruaitu pakhat hril ding cun fimthiamnak le ţong dang thiam khal hi ruatcih lo a ngah lo. Hnam dang thawn kawmawk ţhat ding cun hnamdang sinak le ţong khal zir paih ve a ţul. Hrinhnam le mah ram hrang lawng si loin leitlun huapin thu a ruattu le fimthiamnak nei le ţong dang thiamtu khal kan Chinmi in kan ţul tuk sokhaw, Unau.

A harhdam mi hruaitu kan neih lawngah a harhdam mi ram le miphun sinak kan nei thei ding. Curuangah, Pathian in kan Chinmi hruaitu dingah upa le mino lak ihsin a duhih a hril zo mi … pa/nu hin amah kan ţulzia theiin, “Ka miphun hrangih ka pekawknak sungah mimal hlawknak beisei mi ka nei lo. A tum khal ka tum lo. Kan Chinmi hrangih ka pekawknak hi ka biak ka Pathian hnenih ka pekawknak a siih Amah Pathian in i hniksak tik khalah lungawi diriamnak hmu hram seh,” ti mi lungput thawn Chinmi hruaitu le bawmtu ding karh hram seh tiin rami ka sinak upatnak thawn ka ngan ve ţenţo a si hi.

Thinlung Thiangten,
Philip Van Lal Lian @Bawi Thlang

Leave a Reply

Your email address will not be published. Required fields are marked *