Chinland Defense Force – Mindat le SAC ralkap karlak Thu rel tluang

Mindat : Ni 3-4 sung boruak sosang zetih a um hnu, SAC ralkap ih dilngennak cu Chinland Defense Force – Mindat in lungkimpi in kaphnih thureltlangnak an nei pehzom ih April 27 zaanṭim ah ralkap in an kutsung ih um mino 7 an thlah zalen vekin mipi lam khalin khualeng ih reekbetmi ralkap 30 Lam an ong sak tiah theih a si.

SAC ralkap in Mindat khuasung mino 7 an kai hnu April 24 zaan in Mindat ah kahdonak a suak ih a khaatkhaat in April 27 tiang an kapaw. Ralkap an tuar na ih mithi hliam tuar le mipi kut sungih tang ralkap an um ruangah kapawnak cawl dingin ralkap lam in April 27 zaan lam ah dilngennak an nei.

Kaphnih biakawknak an nei ih mipi in khualeng ih ceepreekmi ralkap 30 luat ter dingin SAC ralkap lam in an dil ih mipi lam khalin ralkap kut sung ih um mino 7 telin a hlan ih an kaimi 5 thlah zalen ding, hmundang ta ralkap dang cah bet lo ding, khuasung ah ralkapdang lut ter bet lo ding, hmainorbet nawn lo ding ti`n an dil ve ih kaphnih dilngenmi hrekkhat lungkimtlang in April 28 ah biakremnak an nei pehzom a si.

SAC ralkap tonrelnak ih telve Mindat khuanu/pa hruaitu ဦးရွှေနိုင်း cun “tuhrih tiangih mino 7 lawng an thlah mi hman hlawknak pakhat a si tiah kan ruat ih kan lungkim. CDF-Mindat lungkimnak telin khualeng ih mipi kut ih um ralkap 30 cu Lam ong sak dingin kan rel” tiah BBC hnen ah a sim.

Tonrelnak ah SAC ralkap lam in nitlaknak saklei ဒုတိုင်းမှူး, ပြည်နယ်ဥက္ကဋ္ဌ, ပြည်နယ်ရဲမင်းကြီး le ဗျူဟာမှူး an tel ih Mindat khuanu/pa lam in ဦးရွှေနိုင်း, ဦးရွှေထန်း le ဦးလောရှိန်းဟာ te pawl an tel.

April 29, sun nazi 2 ah thureltlangnak nei bet dingin biakawknak a um. May 5 khalah Hakha pyine zung lam ah thureltlangnak a um bet ding tiah theih a si ih kaphnih in thurelremnak cu a um nan boruak a ṭha tinak cu a si lo.

Leave a Reply

Your email address will not be published. Required fields are marked *