Chin Phunpi Pawlkom le Chin Phunpi Kilhimnak Ralkapbu dingsuak fel zo

Dothlennak thacaksin dingin le ralkap ukhruainak hrutfai ding tumtahnak thawn Falam peng, Kalay-Kabaw, ramleng um Chinmi komkhawmmi Chin National Organization le mipi kilhim tuding Chin National Defense Forces cu April 13 ah dinfel a si zo thu theih a si.

CNO dinsuah a si thu cu 2021, April 22 nikhenmi ca suah in khuatlang mipi theihternak nei a si ih dinfel a si thu le hmuitinmi hmasabik thusuahnak cu a hnuailam bangtukin a si.

“Federal Democracy parih hrambunmi ramdingkhawm dinsuahnak hrang, Chin miphun mahte relbawlawknak ngahnak hrang, a hngetkhoh ih remdaihnak a ummi zatlang dinsuahnak hrang le tufangih a cang rero mi ramkhel thil thleng ih a telmi pawlkom pawl thawn kutkaiaw in ramkhel thu ih lungkimtlangnak a takih tawlrel suah ding tumtahin Chin Ramkulh (Falam Peng), Chin Ramkulh lenglam (Kalay-Kabaw phairawn) le ram kipih a ummi Chinmi pawl tongaw khawmin ramkhel lamih hmaihruaitu a si mi Chin Phunpi Pawlkom (Chin National Organization) le kilhimnak lam ṭuanvo latu ding Chin Phunpi Kilhimnak Ralkapbu (Chin National Defense Forces) cu 2021 April 13 ni ah dinfel a si.

Chin mipi ih ramkhel hmuitin mi a takih cangsuakter dingah Chin National Organization cun dictatorship cu cimit ko do in, Chin miphun pawl mahte relbawlaw thei dingin le kaa kipih a ṭhangso mi Chin rampi cu Chin pawlkom dangdang thawn ṭuan khawmin kan dinsuah ding a si.

Chin National Organization cun ralkap thuneihnak a phunphun ih dodaltu mipi le nunnak a liamtu miralṭhapawl cu upat sunlawihnak a pe a si. Mipi zaten lungrual zetih ding tlangin dictatorship cu kan do peh vivo ding a si.

Ramdingkhawm thuneihnak pathum dik lo zetih a latu State Administration Council cu Chin National Organization cun a pompit lo thu fiangfel zetin a tarlang a si. Committee Representing Pyidaungsu Hluttaw (CRPH) ih a dinmi National Unity Government (NUG), ramhrin miphun ramkhel hmalatupawl, a dang democracy hmalatu pawl le Chin ramkhel pawlkom pawl thawn ṭuan tlangin dictatorship ziamral ding le Federal Democracy ramdingkhawm a cansuah theinak ding hrang thei tawpin ṭan kan la ding a si.

Leave a Reply

Your email address will not be published. Required fields are marked *