Chin State ah 2020 election hnu zo a CM ding? – Opinion

Kawlram election cu November 8 ah nei ding ih timlamawk a si zo. Central Cozahnak tuah thei ding in MP 333 neih a ṭul. Hizat nei thei an um lo le Coalition (Finkhawm) Cozah tuah zum cio a si.

Chin State ah Pinehluatdaw palai (MP) 18 a um ih Ralkap palai paruk thawn an zaten 24 an si ding. Election hnu ah NLD in a mahte Cozah a tuah thei a si le Chin State ih MP a neih mi sung in CM ding cu NLD Party CEC in a ngaihtuah cawp lai ding mi a si.

Tu ah zo a CM ding ti simcia a theih lo. Zum hmang sim le rel cio men a si. Cu vek thotho in CNLD party khal in Cozah tuah thei ding dinhmun an si ve khal le an Party ihsi MP ngah pawl ih relcawp ve lai ding a si.

Central ah Cozah tuah theinak ding khawp MP 333 neiban an um zum lo cio a si. Himi ah hin Tlangpar Miphun Party an sunglawi zet ding. Kawlrawn region pa 7 ah MP 291 a um ih a zate cun NLD in a ngah ve ce lo ding. State pa 7 dang ah MP 207 a um ih Tlangpar Miphun Party in an ngah tambik ding ih zum cio a si. Ngahtam thei ding khal in an zuam na sa cio.

Central Cozah tuah theinak ding MP 333 neiban an um lo veten Coalition( Finkhawm) Cozah a din zum cio a si. Himi ah hin Tlangpar Miphun pawl zaten Pine Cozah din dan ding le rampi fehpi dan ding pawl nasa tei reltlang hnu ah an duhdan lungkimpi thei Party thawn Cozah an din zum a um.

Abik takin Falam Pine hluatdaw no. 2 (Nitlaknak) lam ih zuamaw tu NLD Party ih si CM ṭuanlai Pu Salai Lian Luai le CNLD Party ih si Pu No Than Kap hi CM dinhmun (Post) zuamaw an si lo ti theih fiang a ṭha. Pinehluatdaw MP ding zuamaw an si sawn.

Pipu thufim ih Sethah hlan ih puan phah an rak ti bang in CM ṭuantu ding rak simcia le relcia rero hi zumhmang thu le Mipi bum tumnak men a si. Election result suah hnu ih thil racang lai ding mi a si.

Kap Thio
Maryland, USA

Leave a Reply

Your email address will not be published. Required fields are marked *