Chin ramkulh pengṭhen 9 ih Tlawngkaitu Cazin

Chin ramkulh khua ṭhenkhat le Lairawn hmun ṭhenkhat ah Covid 19 mina an pung cak tuk ruangah Myanmar harhdamnak zung cun natnak darhsinlo dingin “Stay At Home” a phuang.

Cumi ah Chinram in Falam, Hakha, Thantlang, Tedim, Tonzaang ti`n peng 5 pawl an tel ih hmun ṭhenkhat ah boruak a sia sinsin ruangah cuih peng 5 pawl ah June 7 ihsin Tlawnginn pawl an kharter thluh.

Rampihuap Tlawngon cu June 1 ah a si ih Dothleng cangvaihnak hrang hmalaknak nei in nu le pa in fale Tlawngap loding tiah thuthannak nei rero cingin Chinram ah Tlawngap ding i hminpetu 10,000 luan an um tiah theih a si.

June 4, Tlawngkai ninga ih Chin ramkulh fimzirzung in Khonumthung hnen ih a sim mivek a si le Tlawngap dingih hminpetu 10,000 luan ah tlawngkaitu mipum 4,573 an um ti a si.

Chin ramkulh peng 9 ihsin Tlawngkaitu cazin cu ..

1. Paletwa peng – 2,367
2. Tedim peng – 1,582
3. Falam peng – 474
4. Hakha peng – 78
5. Matupi peng – 72
6. Mindat peng – 0
7. Kanpelet peng – 0
8. Tongzang peng – 0
9. Thangtlang peng – 0

Chin ramkulh ah cozah Tlawng 1,515 a um ih Saya/Sayama 9,667 an um. Cumi lakah CDM tuah ruangih hnaṭuan dawi tuar Saya/sayama 4,237 an um tiah theih a si.

Chin ramkulh Tlawngkaitu cazin cu Covid ruangih Tlawng an phit hlan, June 4 ih suakmi a si ih boruak ṭhat lam pan in Tlawng an ong sal tikah Tlawngkaitu mal/tam salthei dinhmun a si.

Hminsin : Tlawngon ni June 1 ah Falam khawpi ah Tlawngkaitu an um lo tiah theih a si nan June 4 ih Khonumthung update ah Tlawngkaitu 474 an um tiah an tarlang a si.

Leave a Reply

Your email address will not be published. Required fields are marked *