Chin ramkulh ah Covid 19 natkaai Cemfai, Natkaai 10 nak Siizung in suak ding

Kawlram sungih Covid – 19 natkaai mina 232 nak, Chin ram mi cu a taksa ah nathrik a um nawnlo ruangah an tuamhlawmnak Hakha siizung ihsin a suak thlang ding thu theih a si.

Mina 232 nak cu test an nei netabik a voi 2 ten negative a si ruangah siizung ihsin suak siang a si thlang. Harhdamnak lam khalah a hrisel zetih siizung a suak hnu ah ralrin nakah tiin inn ah ni 7 sung Quarantine lut ding a si.

An tuamhlawmanak Hakha siizung ih siibawi cun, “voi 2 rori negative in a lang a si. Tu ni ah siizung ihsin a suak ding. Dam khal a dam zet. Siizung in a suak hnu ah ni 7 sung Quarantine ding a si” tiin a sim.

Mina 232 nak cu Malaysia ram ihsin a umnak Mindat khua ah tlungin Quarantine nei laiih natnak hmu mi a siih, natnak an hmu veten enkol tuamhlawmnak nei dingin Hakha siizung lam ih kuat mi a si.

Chin ramkulh ah Covid – 19 natkaai mipum 10 an um zo ih mina 1, 23, 78, 113, 150, 31, 200, 201, 182 pawl khal an do zo ruangah siizung ihsin an suak ṭheh zo.

Tuah, Chin ramkulh sungih Covid – 19 natkaai 10 nak khal a dam zo ih siizung ihsin suakthlang ding a si ruangah Chin ramkulh sungah Covid – 19 natkaai an cem fai zo a si.

ref:KNT

Leave a Reply

Your email address will not be published. Required fields are marked *