Chin ram hriamkai pawl an doawk thu ah ZRA lam in hitin an rel ve

Chin ramkulh, Tedim peng, Singlei khua kiangah CNA le ZRA ralkap pawl cu April 27 le 28 ah reilote an kapaw.

Doawk thu thawn pehparin ZRA lam cun “kan ramri ah an lut ruangah kahawk mi a si. Kan lam ah hriam tuar an um lo. Netahnu khalah phungdan an pahbal cun a ṭul dan zirin kahdonak a um bet thei” ti`n internet cahmai ah an tarlang.

CNA lam cun kahawknak san felfai in an rel lo ih, ṭuanvonei mipakhat cun “meithal thawm kan theih dan ah thazang 20 hrawng an si ding. Kan lam ah mithi an um lo. An lam ah mithi pakhat an um cu kan hmu. Minute 10 sung hrawng lawng a si ih doawknak fate a si” a ti.

Kan dung 2021 kum ah Tedim le Tongzang hrambun PDF/CDF sakhaan luhcilhawknak thu ah ZRA le SAC ralhraang dotu hriamkai ṭangrual pawl lakah hmuaw thiamlonak a um ih, cuih thu ah le thu puhawknak ruangah hriamkai ṭangrual pawl le ZRA an rak doawk dah zo.

CNA le Dothlengnak boruak ih dinsuahmi hriamkai komkhawmpi Chinland Joint Defense Committee cun ZRA ralkap cu ralhraang an si ti`n an phuag zo ih Dothlengnak an hnaihnok cun a ṭul dan vekin kan kap ding tiah tukum April thla ah thu an rak suah zo a si.

CJDC ṭuanvonei mipakhat cun “SAC ralkap thawn pehzawmawknak an nei mi kan thei ciang ruangah le SAC lamṭang an si nak khihhmuh ding fumfe kan nei ruangah ZRA cu ralhraang an si ti`n kan phuang nak san a si” a ti.

Leave a Reply

Your email address will not be published. Required fields are marked *