Chin ram khawte ah Tidai harsa, Tidai hawl in an Vak an Tawi

Chin ram Patzan khua ah tidai a harsa ih khawsung mipi pawl cu tidai hawl in nitin an vak an tawi tiah theih a si.

“Cakvak deuh pawl cu zing nazi 3 hrawng ah an tho ih tibawh hran ṭulve loin an lak man. Nazi 5 hrawng kim cun ti a cem ih hmuh theilo khawp ih mal, ti puut cu a sang sang in, mah caan kim ding kan hngak. Nitin rorin, zaan khawthim tiang tidai kan bawh” tiin Patzan khua mi Nyaung Ngai Lian cun a sim.

Tidai harsatnak cu a hleice in kum upa lam le cycle, motor cycle lei theilo mi harsa pawl in an tuar hleice cuang. Rawl suang, rawl ei, it caan khal a tikcu ah it, ie, suang thei loin tidai hawl in anvak antawi ih tidai cuhaw in buainak tiang khal a suak ṭheu.

“Kan ṭar ve thlang thawn mi cakvak pawl vekin hmun hla ah kan feh theilo. Tidai phur nakding motor cycle khal kan neilo ruangah khua thawn a neihbiknak cirhti ah sunvu tidai bawh in kan um. Atikcu ah rawl khal kan suang theilo. it khal kan it theilo. A caancaan ahcun tidai ruangah kawk awin buainak tiang a suak ṭheu” tiin Patzak khua ih um Pi Cing Doh Luan in a sim.

Patzan khawbawi Pu Kam Khan Pau khalin “Furpi ahcun a zia deuh nan september ihsin May thla karlak ah tidai a har. Cuih caan ah cun hna khal ṭuan thei loin, khawpawh in suun, zaan tidai hawl in kan vak tawi a si” tin a sim.

Patzan khua cu Teddim ihsin peng 18 hlat nakah a um. Tidai umlo harsatnak cu cozah hnen ah sim thei ringring a si nan tuni tiang tidai harsa in an um ringring a si.

ref:rfa,Emedia

Leave a Reply

Your email address will not be published. Required fields are marked *