Chin Ram Huap Zawng Ih Hnaṭuan Thei Tu Ding Kan Ṭul – Cherry Zahau

Myanmar ram 2020 hrilawnak thleng dingah thlakhat ṭha lawng a duh thlang ih party tinkim ih fakselaw laifang tak a si.

Covid 19 boruak thawn lenglam ah langsar ih hiipawknak tuah remcang lo ruangah online hmang in mah party cio dinpi in phorh aw thluh cio a siih, kan Chin numi lak ih rinsan mi CNLD sungtel Mai Cheery Zahau khal in Chin party zawng ih ṭanlak a ṭul zia le rampi huap hotu ah Chin mi hruaitu nei men lawng hin ṭhansonak a thlen thei lo ti`n a tarlang.

Mai Cherry Zahau cun, “NLD party dinpi in VP2 Pu Henry Van Ṭhio ih thiltitheinak aupitu Chin mi milian pakhat cun Thantlang le Hakha ih Pu Henry Van Ṭhio tuahsuak mi pawl a aupi mi ah thusutnak ka nei ih a sim mi cu:

1. Asuahsemnak Tikir khua ah UPC biakinn ropi a sak. Himi ah Tikir khua ah UPC kohhran inn 10 hrawng lawng an um an ti. Simduh mi cu UPC dodal lam si lo in budget hmandan ka khihhmuh duh sawn mi si.

2. Million paisa cem in tidawl a sak ih an khua ah meisa a tuah sak. Himi hin kiangkap khua pawl duhvekin a hlawkpi phah lo.

3. Tidawl kiangah VIP Bungalow tlakrawh inn a sak nan mipi hrang ah hman a ṭangkai hran lo.

4. Kangmei ṭihnung mi suak dah lem lo nak khua fate ah 24×7 hman theih mi meithat motor le motor dang a ret sak. Mipi in an hmang ṭangkai tuk lemlo.

5. Khua hrang ah lamziin a cek sak nan Tikir-B in Tikir-A feh nak cu ciarbek in a khat.

Chin mi ih kan ṭul mi cu khua khat hrang ih budget lungliam ko ih hman hi a si lo. Bangranten ngah tlang ṭheh ding sawn hi kan ṭul mi a si.

Chin mi VP2 kan neih mi hi Tikir-B hrang ahcun a hlawk zet nan Chin ramkulh zawng ih vun zoh ahcun simding cuca a um lo.

Adiktak cun Chin mi ih kan ṭul mi cu kan mahmawh mi mahte tuah thei nak, thuneihnak, kan pianvo cotheinak, zalennak le ramkulh huap ih ṭhansonak sawn hi a si.

Chin mi hin a simi cu sivek rorin cohlang thiam in kan ṭul mi kan langsuakter a cuu zo. Thuneitu pawl ṭih hmasong lo ih a ṭul mi tuah caan a si. Culawngah hmai kan nor thei dingih kan Chin ram kan tungding thei ding” tiah Mai Cherry Zahau cun a mai bulpak Facebook cahmai ah a ngan.

Leave a Reply

Your email address will not be published. Required fields are marked *