Chin ram ah Kawl ralkap Tatmadaw an relh ding a si le … : opinion

Myanmar ramhuap kilkip ihsin Kawl ralkap Tatmadaw an do tikah an beunak ding cu Chin ramkulh a si thei tiah ramkhel thiamsang pawl in an sim. Laitlang ah Laimi in Tatmadaw pi kan do neh theinak ding lamziin ruah tikah thin a bang duh zet. Van zoh ah a sang tuk ih Lei zoh ah a pit an tivek kha a si. An sungkhaan hlan lo Laitlang ah hmun an khuar thei. An sung hman ah sunkhaan duhlotu kawl ralkap buu an taang thei lai. Cutikah ziang tin kan tuah ding?

Asi! Kawl ralkap Tatmadaw cu ramsa hman tluk lo mi, tualthat, suamhmang, mi kaihrem hmang, sualnak thawi khat mi an si fawn! Rualpi hrekkhat thawi ramkhelthu kan relnak le ca hrekkhat siarmi ihsin ruahnak hrekkhat kan sarsuak mi a um.

Casiartu in na ruah cia lole ruahnak bangaw khal kan rak si thei. Aṭha a si ahcun hman ding an si ih, casiartu khal in na idea ṭhaṭha na bet ding ah ka lo sawm cih. Hiti` ruahnak hlawmawk tikah a hramhram ih luhforh a si hrimhrim lo ti kha upat zetin ka lo theiter fawn.

1. Funtuam-Hruaknak
Laimi kan ṭekdarh tuk ruangah Federal ralkap lole phundang ih komaw a har. A umcia mi CNA ah kan tom aw ding. Cucu Federal ralkap a si. Mino pawl lungtho in mah te ciar CNA kan direct kan pehzom pei. Cucu funtom awknak hrang a rang bik mi a si.

2. Training Kai Thluh Ding
CNA an man lai ah Training kai cio uh si! Zarhhnih-thum caan pek uh si! Kan khel lo pang ding! Lai ralkap sung ah lut in hramlak um fekfek lo tla a ngah. Mino hmuahhmuah, Fala/Tlangval. …. Amantu, ralringtu zaten Training kai cio ding a si. Chin miphun, lainu laipa kan zaten meithal kah dan kan zir lohli ding.

3. Sumpai le Rasin
Chin National Army timi Lai ralkap ih kan funtom aw theinak ding ah sumpai mah ti thei zat ciar kan thawh ding. Mino pawl CNA ah pawlkom aw ih thazang lakhruak thei lohli a ṭul. Ramdang um unau rualpi pawl khal CNA ah direct rori`n zamrangten ṭanpinak pek cio uh si.

4. Zaran Mipi Timtuah Ding Mi
Fangfai rasin ret aw cia ṭhepṭhep ding. Khawtelam cun meithal thup thluh sehla, zian le cerek khawl cia uh si. Khaw Upa pawl .. Khawtlang Uupa pawl zamrang thei tawk timtuah uh la Kawl ralkap Tatmadaw ṭhuat daan ding kha zamrang te in tawlrel cia uh si.

5. Lairawn Laimi Tuah Ding Mi
Lairawn laimi cun meithal na nei lo na in Fangfai Rasin na nei! Na unau tlangparmi hrang pek thei ringring ding rorin tiar awk cia aw. Lairawn mino pawl laitlang ah kiir sal in laitlang runsuak sal aw.

Athupi bik miangmo cu meeting rero caan a um nawn lo ruangah Mino pawl CNA ah mah lungtho ten direct kan pehzom cio pei! Nu le pa pawl in ram le miphun hrang thlacamnak thawn, a ṭul mi sumpai rasin thawn, thapek awk cio uh si. Laimi mino kan zaten meithal kah kan thiam tengteng a ṭul!

#Hminsin… A tu lawlawse Laitlang a um mi Kawl Ralkap Tatmadaw cu an malte. Khawpi pakhat ah za kiangkap hrawng an si.

(Cangantu – Pa Lawm)

Leave a Reply

Your email address will not be published. Required fields are marked *