Chin raltlan thu ah CM Pu Zoramthanga in India Prime Minister Modi ca a kuat

India central cozahpi in a ramsung ah Myanmar raltlan lut lo dingih thu a suah mi thuthawn pehpar in Mizoram Chief Minister Pu Zoramthanga in India Prime Minister Narendra Modi hnen ah dilngennak ca a kuat ih “India ram hin hnaset tun mending a si lo” a ti.

Cuih cakuat cu 2021, March 18 nikhen mi a si ih CM Pu Zoramthanga cun hitin a ngan.

“Kan theih cio vek le kan hmuhhngan rori ah Mihring siatralnak Myanmar ram ah a thleng. An ram ah hnoksaknak le harsatnak tumpi a suak ih an mah kilhimtu sisawn dingmi ralkap pawl cun bawmtu neilo mipi pawl cu a duhdan vekin a dekcawk ih nitinten hrem in a that hai.”

“Km 510 sau mi Myanmar-Mizoram border kaan in ṭihkhur phah ih tlantu Myanmar raltlan pawl cu beunak le humhimnak hawl in an ra. Raltlan dinhmun ih um ramhnih border ri ih um Chin community pawl cu Mizo thisenzom an si ih India Independent a ngah hlan ihsin pehtleihawknak nei ringring mi kan si.”

“Curuangah thih le nun dinhmun ih um kan thisenzom pawl hi kan nih Mizo pawl in theilo vekin kan um san men theilo. India rampi khalin kan inn dunglam tualrawn ih thil thleng rero hi hnaset tun men ding a si lo.”

“Ministry of Home Affair cun India ram ih tlanlut Myanmar raltlan pawl cu khulrang felfai zetih kuatkir lohli dingin North eastern States border ih ṭuanvonei Chief Secretary hnen ah thuron a pe. Cuihtlunah ramri kiltu dingah Assam Rifles le Border Security Force pawl a thlah hai. Himihi kan nih Mizoram cun kan cohlang theilo. Central cozah lam in kan ram foreign policy vekin a ṭuldan vekin an cangvai ti cu ka thei thiam ko. Asinan hih “humanitarian crisis” hi theihpi duh lo vekin um ding kan si lo.”

“India hi leitlun ih democracy ukhruainak hmangtu ram tumbik kan si ih buainak in a khat mi kan ram hnen Myanmar hi tuhnakih caksin in kan bawm ṭul ih tuhnakih kau sin in sangka kan on a ṭul. Curuangah hih thuhla ah hin nangmah rori`n hrolhaw in hmalaknak in nei sak aw. Cutin, Myanmar political refugees pawl cu kan ram ah thlamuang zetin an beu thei ding” ti`n Mizoram CM Pu Zoramthanga cun Myanmar raltlan pawl cohlang dingin Prime Minister Narendra Modi hnen ah ca a kuat a si.

Kawl ralkap pawl in February 1 ih Myanmar kumpi cozah thuneihnak a la hnu ah ralkap ukhruainak duhlo ruangih kan ram suahsantu cozah hnaṭuan an tamzet.

Tuhrih tiangah India Central cozah cun a ram ih Myanmar raltlan lut ding hi a duh lo ih daan loin India ramsung luttu um lo dingin ralkap phunphun thlah in border a kil him ter.

Asinan Mizoram cozah duhsaknak ruangah le border kiltu hrial in India ram ih tlan luttu Myanmar raltlan mipum 1000 hrawng an um zo tiah The Hindu in a ngan.

Leave a Reply

Your email address will not be published. Required fields are marked *