Chin ralkap pawl mah le mah an kapaw nak san relfiang

March 25, Thantlang peng, Ngaphai khua ah Chin ralkap CDF – Mara le Maraland Defense Force(MDF) ralkap pawl an doaw ih hriam tuar an um hlei ah mithi khal um in, atu ca kan ngan tiang khalah an kapaw lai tiah theih a si.

An kapaw thok dan cu a hnuailam bangtukin Chinland Defense Force – Mara in thu an suah.

“Maraland Defense Force(MDF) cun 2022, 25 March zaanlam ah CDF – Mara hrambunnak hmun ah mitam ralthuam famkim thawn sakhaan lak dingin hmunram an ra nor.”

“CDF – Mara hmunram a si mi Ngaphai khua ih CDF ralkap le khuanu khuapa sim than hmasa loin, hriamhrei ralthuam le ralkap thazaang famkim thawn hmunram an nor mi kham an si ruangah MDF lam in meithal kap ṭhihawknak in siseh, khawmi mino pawl Tlawnginn ah pungkhawm terin meithal voi tamzet an hmet puak ih CDF – Mara ralkap pawl an kap that.”

“Cumi boruak ah CDF – Mara lam ihsin ralkap pakhat kan sung ih, hriam tuar 2 an um. Curuangah CDF – Mara lam khalin kan kap ve ih atu thu kan suah tiangah kahdonak a sosang zet lai” tiah Chinland Defense Force – Mara in thu an suah ih nunnak liamtu le hriamtuartu innsang rualin CDF – Mara in an tuarpi ve thu an tarlang.

Edit : Maraland Defense Force (MDF) le CDF Mara an kap aw thu ah Mara Administrative Territorial Council Headquarters ihsin a tanglam bangtukin thu an suah ve…

Siarbet : Mara hriamkai pawlkom 2 an kapaw ih CDF ralkap 1 nunnak liam

Tuni, March 25 ah Maraland Defense Force & Mara Army (MDF) le CDF Mara an kapaw ih CDF ralkap Salai Pawpaw Mahein nunnak a liam tiah theih a si.

Ziang ruangah an kapaw ti cu thu felfai a suak hrih lo nan, MDF ralkap pawl in Thantlang Peng, Ngaphai khua ih CDF Mara umnak an va kap ruangah kaphnih doawknak a suak tiah an sim.

Thuthang pholangtu The Hakha Post cun “Doawknak ih nunnak liam Salai Pawpaw Mahein cu Palik CDM luttu a si. Kapawknak hi tuni March 25 ah a si ih mipakhat a thi ti lawng kan thei hrih” tiah an tarlang.

Doawknak ah nunnak liam tiih tarlangmi Salai Pawpaw Mahein

Maraland Defense Force cu Mara Army le CDF-Mara komkhawm ih dinmi a si ih, cumi ih tel duh lo pawl cu CDF-Mara ti`n a hran ten an um.

CDF-Mara cu Chinram SAC ralhraang dodan olsam deuh dingih ralkapbu komkhawmmi CJDC sungtel an si.

Leave a Reply

Your email address will not be published. Required fields are marked *