Chin ralkap kut tuar Ralhraang ralkap tampi Hakha Siizung ah tlanpi cih

Falam-Hakha zinpi doawknak ih hriam tuar ralhraang ralkap 15 hrawng cu Hakha khuasung an thleng veten siizungpi ah an tlanpi cih tiah tualsung ihsin thuthang a suak.

Hriam hma tuar pawl dinhmun cipciar cu felfaiin thu a suak lo nan, cupawl lakah kum kim lo nauhak ralkap an tel ti a si.

Ralhraang ralkap hi July 17 zaanlam nazi 4 luan hrawngah Hakha khuasung an lut ih, cufang ah puak kuai thawm ring zet a suak tiah khawmi pawl in an sim.

Puakkuainak a suak mi cu zoi` pawlkom tuah mi a si ti a fiang lo. Miṭhen cun an mah ralkap lala in an puah mi a si thei tiah an rel ve.

Siarbet : Ralhraang ralkap pawl Hakha khuasung an lut lai ah Bomb a puak : Report

Falam-Hakha zinpi ih Khuate pawl urkaang phah vivotu ralhraang ralkap pawl Hakha khuasung an lut lai ah rinlopin bomb a puak tiah The Chin Journal in a tarlang.

Falam-Hakha zinpi ah zarhkhat luan an rei hnu, July 17 zaanlam nazi 4 luan hrawngah Hakha khuasung an lut ih, culai fangah Bazaarthar veng ihsin puakkuainak voikhat a suak tiah khawmi pawl in an sim.

“Ralhraang ralkap hi mawṭaw 20 hrawng thawn an si. Khuasung an lut lai ah puakkuai awn ring zet a suak. Ralkap bat in an puah hrim mi maw, ziangtin a si ti cu kan thei ciang lo. Hriam tuar an um le um lo timi khal felfaiin kan thei lo. Khawngaw an um ti`n khal an rel nan thuhla felfai kan nemhnget thei lo. An mah ralkap puah mi khal a si thei” tiah khawmi pakhat cun a rel.

Ralhraang ralkap hi Falam ihsin Hakha lam pan in July 7 ah an poksuak ih nazi 2 sung hrawng lawng an rei ṭheu mi Falam-Hakha zinpi ah ni 10 ṭha an rei.

Lamzintluan ah inn tampi an urkaang ih, Chin ralkap ṭangrual pawl thawn nasaten an doaw phah. Kahdonak ah ralhraang 60 lenglo an thi ti`n CNA ṭuanvonei Salai Htet Ni in a rel ih, mipi ralkap lam khalah nunnak liam le hriam tuar an um ve.

Tu dinhmun ah ralhraang ralkap pawl Hakha khuasung an thleng zo thu theih a si ih, ziangtin an cangvai bet tum timi cu atufang Chin mipi thlir bik mi thuhlapi a si.

Leave a Reply

Your email address will not be published. Required fields are marked *