Chin Phun Suah Ni le Surbung Vanzam tualrawn onpuai hrang thuthang update

Covid boruak reh deuh in Harhdamzung lam in mipung khawm tam deuh a siang asile Falam Surbung Vanzam tualrawn onpuai cu Chin phun suah ni February 20 ah tuah cih dingin beiseinak a um thu Chin ramkulh Siipin ṭuanvonei U Soe Htet in a sim.

“Tuah ṭheh zo a si mi Surbung Vanzam tualrawn onpuai cu Chin phun suah ni thawn tuahtlang ding beiseinak a um ih tlunlam bawi upa hnen ah dil seh la a ṭha pei maw tiah ruahnak a um.”

“Asinan, tuvek Covid boruak ih mipum 30 lawng pungkhawm siang a si ahcun tuah a remcang lo ding. Nan, boruak thlengaw in February thla lam ah mi tam deuh pungkhawmaw siang a si len Chin phun suah ni cu Hakha lole Falam ah tuah seh la, Cun Surbung Vanzam tualrawn onpuai khal tuah cih lawlaw seh la tiah ruahnak a um” ti`n Chinram Siipin bawi U Soe Htet in a sim.

Chin phun suah ni hman ding thu thawn pehparin Chinram cozah in tuah a tum le tumlo timi cu official in thlangthannak a nei hrih lo nan, a ni thleng tikih mitam pungkhawm sian a si lo khalle mimal in tuah thotho an tum tiah theih a si.

Tuahnakding hmuhma thawn pehpar in U Soe Htet cun “Falam lole Hakha ah tuah dingin ronaw a ṭul” a ti.

Chin phun suah ni cu rampi level in kum tin tuah ringring a si ih, Kum 2020, February 20 ih tuah mi voi 72nak Chin Phun Suah Ni cu Thantlang khua ah hluanghlai zetin hman a si ih rampi thuron Daw Aung San Suu Kyi khalin a telpi a si. (Chin World)

Leave a Reply

Your email address will not be published. Required fields are marked *