Chin Party lole Mai Tappi Party tha a rak pek ringringtu Falam Mipi – Francis Cung Bik

Falam timi hi Chin thuanthu ih a thupi zetmi Khua, Peng le Miphun kan si. Miphun, phunhnam pakhat ih a tuahṭuannak le a lungput par ihsin zohin hi miphun cu upat tlak a si maw? ṭihzah tlak a si maw? ti a lang ter.

Falam mipi cu 1951 ihsin Pu Za Hre Lian ih dinmi Chin Congress Party (Chin Hills Congress) tha rak pektu kan si. Asinan 1990 hlan ih Myanmar rampi ramkhel thu rel nawn lo in Santhar ramkhel thu, 1990 hrilawknak in ka thok ding.

U Ne Win (Burma Socialist Program Party) in Myanmar rampi cu kum 30 zik a rak uk. 1950-1960 ah Myanmar rampi cu Asia ram pawl lakih larsang ram pakhat, South East Asia ih ram ṭhangsobik timi a si nan, Ne Win ih uk kum 27 sungah Myanmar rampi cu leitlunih ram farah bik pakhat ah a cang.

Pu Za Hre Lian

Ne Win ih Uknak cu mipi in an ning thluahthlo, an khop tuk ruangah 1988 ah tlawngta pawl hohatnak in duhphorhnak tumpi a rak suak. Cui hnu kum 2 rei, 1990 ah Myanmar rampi ah hrilawknak cu tuah a rak si.

Culai ih rampi huap ih party lar zet pahnih tla cu U Ne Win ih Burma Socialist Program Party hmel thar ih thlengmi National Unity Party (NUP) le Pi Aung San Suu Kyi ih party NLD tla an si.

1990 hrilawknak ah Chin ramkulh ah Mee-hmun (Constituency) 13 a rak um. Falam peng in Mee-hmun 2 kan rak co. Culai ah Falam pengah NUP, NLD le CNLD tiin party 3 rak zuam aw a si. CNLD ihsin nisuahnak Mee-hmun No.1 ah Pu C.K Tei Kual le nitlaknak Mee-hmun No. 2 ah Pu Za Hlei Thang tla in an rak zuam. Pu C.K. Taikual (CNLD) in (mee 12,531 ah mee 6,127 in 65%) le Dr. Za Hlei Thang (CNLD) in (mee 12,501 ah mee 4,753 in 50%) in an rak neh. Cutin 1990 hrilawknak ah Falam peng ahcun Central Party (Kawl party) in nehnak timi cu a rim te hman an rak hnim ban lo. Falam Mipi cu mai tual ih a ṭo mi Tualṭo Party, Mai Tappi Party (Chin Party) tha a pektu an rak si.

Pu Za Hlei Thang

Ralkap ih diklo zetih rampi thuneihnak an lon ruangah 1990 hrilawknak cu nung suak lo in, cui hrilawknak ih a teltu pawl riangri mawh le sual phurh in a hrek cu thawlng tlak na, a hrek cu mai inn le lo ah um ngam lo ih hmun dang ram dang ah rak tlan in um an rak si. Cutin kan ram cu ralkap in kum 20 tluk a uk hnu ah 2010 ah hrilawknak tuah sal a rak si.

2010 hrilawknak ah NLD an rak zuam lo ruangah rampi huap in cu USDP in nasa takin a rak rawt. Asinan Chin ramkulh, a hleice in Falam peng ahcun USDP in nehnak hmun khat te hman a rak co lo. 2010 ah Falam peng in Ramkulh MP 2, Amyotha 2 le Pyituh 1 tiin Mee-hmun 5 kan rak co.

2010 hrilawknak ah Falam peng Pyituh Hluttaw MP ah minung 4 an cuhawk ih Pu Khuang Ling (CPP) in (mee 23,383 ah mee 8,975 in 36%) in a rak neh. Amyotha Hluttaw hrilawknak ah Falam peng meehmun No. 1 in minung 4 in an cuhawk ih Pu Con Kheng (CPP) in (mee 12,233 ah mee 4,785 in 39%) in a neh. Amyotha Meehmun No 2. in minung 3 in an cuhawk ih Pu Zung Hlei Thang (CPP) in (mee 12,250 ah mee 5,230 in 42%) in a neh.

CNLD logo

2010 Ramkulh hluttaw hmun 2 ih a zuam awtu party pawl tla cu CPP, CNP, USDP le NUP pawl tla an siih CPP in a hmun 2 ten a rak neh, meehmun No. 1. Pu Nah Thang le meehmun No. 2 ah Pu No Sun pawl in nehnak an rak ngah.
USDP thlipi nasa zetin a hrang nan Falam Mipi cu mai Tualṭo party te tha a pektu an si.

Myanmar rampi Democracy daan a fek vivo ih ralkap hmuihmel kopmi thil pawl a cang thei tawk ih hlon hi mipi in in duh vivo. Curuangah 2015 hrilawknak ah USDP lam in nehnak ngah lo rori in NLD in cozah din thei ding hi zo cio ih rak beisei a si.

Cui beiseinak mei hlio cu Falam mipi lungthin sungah tla a rak alh hluahhlo. Cutin 2015 hrilawknak ahcun kum 50 leng mipi cozah ti a rak um dahlomi din bawmnak ah Falam Mipi tla in NLD tha pek a siih Ramkulh mee-hmun No.1 ah Pu Ral Hnin, mee-hmun No.2 ah Pu Lian Luai, Amyotha ah Pu Zung Hlei Thang le Pyituh ah Pu Riang Vel pawl in nehnak an rak ngah.

2015 ih hrilawknak hi Falam mipi in kan sulhnu, kan thuanthu taan lawk in kum 50 leng a um dahlomi mipi cozah dinnak hrangah kan rak tel ve.

A ra dingmi 2020 hrilawknak teh Falam Mipi ziangtin kan lak ding. Falam Mipi cu kan tual ih a ṭo mi Mai Tualṭo Party tha a pektu, Kawlrawn pangpar Padauk hnakin Sokhlei, Faizong a duh sawntu kan si tiin kan sulhnu kan thlun ding maw? Maw santhar ramkhel lungput tiin Kawl party tha kan pek men ding? Kawl party tha kan pek vivo sehla tu hnu kum 10 – 20 ah ziang kan bang pei? ti pawl ruat phah in……

Francis Cung Bik (VCTH)
Zuk : lungthli blogspot, CNLD – Falam Township, Wiki

Leave a Reply

Your email address will not be published. Required fields are marked *