Chin Pacangṭha pahnih i hnawngmi Chin SAC Chairman sinak cu Pu Ngun San Aung an pe fel

Kawl ralkap in rampi cozah thuneihnak a la hnu ih a din suahmi Chinram cozah thar Chin State Administration Council ih chairman ding ah Chinram ih rinsanmi upa pahnih ṭuanvo an pe nan an cohlang duhlo tiah theih a si ih, SAC sungtel dingih lakmi Pu Ngun San Aung sawn cu Chin State Administration Council Chairman si dingin February 16 ah an nemhnget a si.

Chin State Administration Council chairman dingah ralkap cozah in Pu Ni Khuai fapa Pu Terrance San Mawi Ni khuai cu ṭuanvo an rak pek ih Pu San Mawi cun February 3 ah a rak cohlang.

Asinan, Pu Terrance San Mawi Ni khuai cu vansiatthlak zetin ralkap i pekmi sinak thar a cohlang hnu ni 8 nakah mual a liam.

Curuangah ralkap cozah in Pu Terrance San Mawi Ni khuai aiawhtuding ah Chinram ih rinsanmi upa pahnih hnaṭuan an sawm mi a si ih an cohlang duhlo ruangah SAC sungtel dinhmun ih lakmi Pu Ngun San Aung cu Chin State Administration Council Chairman dingah an khaisang a si.

February 15 zing ih ralkap hnaṭuan sawmnak rak eltu Pu Siang Mang cun “in fial taktak ko. Asinan ka el hai. Asancu mizapi ih duhlo mi cozah kaihhruainak sung ah hnaṭuan ka tum dahlo. Cun, 2020, November rampi hrilawknak khalah mipi duhsaknak in ka rak tling. Hitluk rori`h in duhdawttu ka mipi ka phatsan duh lo. Curuangah ralkap sawmnak cu ka co hlang lo” tiah The Hakha Times hnen ah a sim.

Pu Siang Mang cu 2020 rampi hrilawknak ah CNLD party palai dinhmun ih a tling umsun a si.

Ralkap hnaṭuan sawmnak rak elvetu mipakhat cu Pu Thla Hre a si ih February 15 ah Chin State Administration Council (SAC) Chairman siding ih ralkap hnaṭuan sawmnak cu a rak el ve.

Amahcun “Chairman hlun Pu Terrance San Mawi Ni Khuai mual a liam pekte hrawng khan in rak thlir thok zo. Ka profile an zoh ih Ukhruainak lam ih hmuhton ka nei mi, GAD zung ah kum 17 ka rak ṭuan dah mi, State Municipal Director tiang ka rak ṭuan ban mi an hmu tikah hnaṭuanpi dingin in hahio deuh si ding.”

“February 15 ah in ko ih komaw cia kan si thawn nangmah nih in ṭuansak ṭul ko ding in ti. Ka ruat aw ta ding ka ti ih caan malte sung ka ruat ṭha. Ka sung le pawl thawn kan ronaw hnu ah hitin ka let hai. ‘Rualpi hlir kan si ko. Asinan, bulpak rualṭha sinak hnakin mizapi hrang ah hnaṭuan in an duh mi uknak tang ih mipi thawn hnaṭuan tlang kha ka duh deuh. Curuangah, in theithiam hram uh, ka ṭuan theilo si ko’ ka ti” tiah The Hakha Times hnen ah a sim.

Mipi mithmai zohin ralkap hnaṭuan sawmnak rak eltu Pu Siang Mang le Pu Thla Hre ai ah Chin State Administration Council (SAC) Chairman sinak cu February 16 ah Pu Ngun San Aung an pe a si.

Leave a Reply

Your email address will not be published. Required fields are marked *