Chin nu in Cabu ropi let suak in Tlangzarhnak nei, Aman le Lei theihnak cu …..

Siarsuaktu thinlung tham zettu , Leitlun huap cangan thiam le thusim thiam hminthang Joyce Meyer ih ngan mi “Battlefield of the Mind” timi cabu cu “Thinlung Raldonak” tiah let in Chin nu Mai Sui Khaw Nei (Sui Sui) in cabu thawn a suah thu theih a si.

“Battlefield of the Mind” cabu cu Pathian rongbawl Joyce Meyer ngan mi cabu tamzet lak ih hmingthang, khongtambik pakhat a si ih New York Times ih zuar khong bik mi cabu ah a tel ban ve mi a si.

Cuvek dinhmun tiang thleng ban mi cabu cu kan mah Chin ṭong rorin mipi thazang laknak ding ih in suahsak cu lungawi um tuk rori. Minung tam zet nun thleng tu cabu ropi pakhat a siih kan mah Chin ṭong rori ih ngan mi siar ngahtu nun khal ah danglamnak suak ter thei ding ih beisei mi cabu pakhat a si.

“Thinlung Raldonak” cabu cu United Chin Publication Board (UCPB) in a suah sak ih uk khat ah 2000 kyat ngen in tlangzarh zo a si.

“Battlefield of the Mind” cabu roipi cu kan ṭong rori in siar ding a um thlang ruangah rak lei tengteng aw la na siar ṭheh suak cun a ding felmi lamziin zawh ih ṭhangso vivotu dinhmun ah a lo can ter ding. A lei duhtu kan um si le cangantu Mai Sui Khaw Nei (09420057194) hnen ah le Good Neighbour Ministry cabu dawr, Chin Synod cabu dawr pawl ah na sut hlam thei.

Cabu suahtu Mai Sui Khaw Nei hi Kalay University, BTS le CCIT ah degree 3 ngahsuaktu a siih 2013 kum, Falam kiang ih motor cangsual nak ah tel ve in a ke a siat ih, Tu ah tohLeng thawn khawsa a si.

Cabu siar tlak hrimhrim a si ruangah le a mah thazaang pek phah in a cabu suah mi “Thinlung Raldonak” cu lei tum cio uh si.

zuk:Salai MaZawn

Leave a Reply

Your email address will not be published. Required fields are marked *