Chin Mipi Kut Ah Thuneinak Um Seh

Common Identity, Common Enemy & Common Interest
Miphun lungphum hngetbik cu lungrualnak hi a si

Common Identity
Thinlung Kau Zetih Têlkhawmawk A Thiam Mi: Naga, America le Indonesia

“Naga hi Pathian camsiat mi miphun kan si” tiah an mithiam Panger L. Imchen cun rehsia zetin a rak ṭawngsuak dah. Hrinhnam dangdang 19 an si ih, ṭawng khal theiaw riai lo, thuthangca khal suah thei lo an rak si nan an miphun caktertubik cu Naga identity ah a si, cuih an ‘common identity’ ih an lungrual thei tuk ruangah India cozahpi khalih upatṭihzahtlak miphun ah an tuahaw thei thlang.

America ram khi leitlun ramkip ihsi miphun kip vaihkhawmnak a si an ti. Hmansehla thinlung thuk ngaingai nei in, ‘Melting Pot’ an ti vek, bêl pakhat sungih rawlhmeh a phunphun suankhawm mi, hmehthaw zet vekin American identity kha thupibik ih an ret cio ruangah miphun cak hleice ah an tuahaw thei.

America ih khawsa hmaisabik Red Indian-pawl khal ‘Native American’ lole, ‘Amerindian’ an ti hai. Black American, American-Japanese, American-Chinese, American-Korean, African-American ti`n miphun dangdang vaikhawm an si nan an ‘common identity’ American ti mi ah hnget zetin an têlkhawmaw a si.

Indonesia: Indonesia ram tikulh 6000 lai ih ṭhenawpawl, ṬAWNG a phunphun le biaknak a phunphun ih ṭhenaw celcel hmanin ‘harmony in diversity’ tiin lungrualnak thupi hmangin cozah cak zet an din thei a si. 2020, June thla sung khalah Tuluk hro dingin a raldonak lawng ṭha zet thawn South China Sea a pan ngam a si kha.

Chin ti hi a nung mi hmin a si vekin kan suahsemnak Chin hmin ‘genetic name’(common identity) ah lungrualtei telkhawmawk kan thiam asile Naga-pawl vekin Kawl cozah hmaiah cak zet le upatṭihzahtlak ah kan tuahaw ve thei ding. Khristian kan sinak hrimhrim hmanin pumkhataw thei tuk ding kan si.

COMMON ENEMY
Chin miphun hmuahhmuah hin kan do mi le kan râl (common enemy) a bangrep ti hi theihfiang a ṭul bik. Ziang kan do-tlang ti kan theih lo asile mah le mah doawk natsat pangnak a si.

Leitlunpi hman kum 1000 lai rak uk thei Rom cozah lubânpawl le an mipi kha an do-tlang mi (common enemy) a bangawk lo cinah cun pumkhatawknak a um nawn lo ih, leitlunih miphun aa-bik sahring ei Barbarian-pawl in AD 417 ah awlsamten an rak neh thei. cutin sahring ei Barbarian kut hnuaiah leitlunpi cu cân reipi a rak rûm nasa dah.

Rom cozahpi kha tuihsan NLD vekin FEDERAL ngaingai duh si loin Democracy lungrualnak lawngih ram uktu an rak si ruangah ralhrâng an rak tam tuk lawmam a si. Greek ram khal kha lungrualnak um lo Federal lawngih ram din an si ruangah Rom in an rak neh hai.

Federal ih hruaiawkdan thiam hmaisabik le mifimbik Greek miphun kha ṭawng pakhat hmangtlang, nunphung bangrep le politics hruangkulh pakhat sungih khawsatlang an rak si nan lungrualnak an nunpit lo ruangah State tin in an ngaihaw lo ih, miphun HUAP lungput an rak neih lo ruangah ram cu an din thei ko nan miphun (nation) cu an dinsuak thei cuang lo ti ih hminsin an si.

Chin miphun hmuahhmuah hin do-tlang mi (common enemy) pakhat lawng kan nei ih, cumi cu DIKLO tukih kum 50-60 sung in palbettu UKNAK (policy) le bumawknak a si ti hi theithiamin lungrualteih telkhawmawk hi kan thupitterbik ding a si thlang. In palbet ringring tu ih BUM thei mi cathiam kan nei tam pang ding ti hi phamumbik cu a si.

Kabaw phairawn ihkan pupa kum 500 sungpi an rak khawsaktlang laiih an tisualbik mi cu LUNGRUALNAK an neih lo kha a rak si ih Shan miphun in awlsamten an rak neh hai. Miphun Lungphum Hngetbik Cu Lungrualnak hi Si. Thuneihnak cu Lennak a si. CHIN MIPI KUT AH THUNEIHNAK UM SHE.

(B. Lal Lian Thang)

Leave a Reply

Your email address will not be published. Required fields are marked *