Chin Mipi ih thei duh zetmi Chin National Organization sungthu

Kawlram a buai hnu Chin mipi humvennak hrangih dinmi Chin National Organization sungthu cipciar thawn pehpar in mipi lam in thusutnak a suak ṭheu ih, Chin mipi thei duh zet mi thusutnak pakhat cu a hnuailam bangtukin letsaalnak an nei.

CNO hi CNF le NUG thawn pehtlaih awknak an nei maw?

CNO hin CNF le NUG thawn kan pehtlaih awk le pehtlaih lo dan thu hi a hnuai thu lu pa nga hmang in fim fiang awk kan tum dingih, a fiang deuh lo a um a si len comment lam ah suh nak le san nak kan tuah vivo mei ding.

1. CNO hi CNF donak ih dinmi a si lo
Hrekkhat pawl in CNO/CNDF cu No Than Kap ih tu le fa pawl in CNF ngaih lo ruangih din mi vek in an rel. Kan simawk cia zo vek in, CNO kan din nak san cu Falam mi le sa humhim dingah mah le umnak ciar ih mah le group ih hriamkai mino pawl hmunkhat te ih hlawm awk thei nak ding ih din mi a si sawn.

2. CNO ih a Do mi le a Kawp mi
CNO in a do mi sawn cu kan parih dik lo tuk ih thu neih nak la tu pawl sawn an si. CNO cun Federal Democracy kaihhruai awk nak a duh ih, Federal Democracy pe ding in a tiamkam tu NUG thawn khal a tu ah cun an tuantlang rero ko. Asinan, NUG lala in an tiamkam hlen lo in Federal Democracy pe duh lehlo vek an um sal ih Dictatorship thawn in uk tum a si len a do ral thar ding NUG a si la la ding. (Cu ti vek a thlen lo hram kan beisei).

3. CNF ih a do mi le a kawp mi
CNF ih tumtahmi khal Chinram ah Democracy diktak (Federal Democracy) kan ngah thei nak ding ti a si. Federal Democracy ngah thei lo ding ih don kham tu poh poh an ral a si ih, Federal Democracy ngah dingih zuam ve tu hmuah hmuah cun an rualpi a si ve mei. Cu ruangah Federal Democracy tiamkam tu NUG thawn alliance an tuah ih, Rallokap pawl cu a do ve.

4. Do mi le Kawp mi bangaw
Cuvek ih tumtah nak bang aw mi cu hmunkhat ah finkhawm aw thei lo khal sehla an ral awk nak ding san a um lo. CNF in CNO hi tuanpi tlak ih a ngai a si len CNO cun tuanpi ding hrehnak zianghman a nei lo, miphun dangpi NUG thawn hman tumtahmi a bangawk cun a tuan tlang thei.

5. An ral bangaw, an do tlang
CNF le CNO cu tutiangah cun Political policy zawng in ziang agreement hman an tuah hrih lo nan, rallokap uico pawl donak ah cun an ralkap veve a si mi CNA le CNDF cu bawm aw ton ten a vei tampi an do tlang zo. Kalay lam khal ah NUG ih ralkap PDF pawl thawn Uico pawl a vei tampi an do tlang zo.

(Hminsin : Chin Federal Army FB cahmai ih tarlangmi mipi thusut letsaalnak hi “CNO hin CNF le NUG thawn pehtlaih awknak nan nei maw? (Mipi thusuhnak)” Chin National Organization official thusuak a si lo timi mipi hnen ah theihternak kan nei duh a si)

Leave a Reply

Your email address will not be published. Required fields are marked *