Chin miphun cawisang in CNLD vote aw

PRINCIPLE Ṭha A Nei Mi POLITICS HRUAITU

US rampi President ah kawhhran upa an rak hrilsual ruangah vânza an rak tham dah. Kan President Nixon hin in bum ti an theih cinah cun US mipi cu an thin a na tuk ih, an president dingah mibumhmang lo, midik le hminsiatnak nei dah lo an rak hawl ciamco ta, cutikah an saduhthah vekih hminsiatnak nei dah lo kawhhran upa pakhat cu rampi President ah an rak hril.

Amahlawngte, President ih an hril mi kawhhran upa cu hminsiatnak nei dah lo le mifim, midik cathiam sangzet a si ko nan politics thiam lo, politics lamih PRINCIPLE nei lo a rak si ruangah an rampi fehdan cun mu le mal a nei thei nawn lo ih, cutin US mipi cu mangbangin an rak rûm ih thil ziangkim hi a rak hnawk thluh.

US President Dwight D Eisenhower, Franklin Roosevelt, John F. Kannedy le Bill Clinton tipawl kha nunau thawi hminse zet an rak si hai nan ram mipi in an bulpak sualnak an rak zohsak hai lo ih. kan President hin ṭhansonak lamzin in zawhpi maw? President mawhphurhnak a phur thei maw? a hnaṭuan tlin thei maw? ram mipi a duhdawt maw? ti lampangin an tah hai a si.

Mifim hminthang President John F. Kennedy le Hillary Clinton pasal Bill Clinton tla kha cu President an ṭuan lai rori ih fala thawi cângsual le hminse zet an rak si kha. Hmansela US mipi hin an sualnak lam an zohsak hai lo; an PRINCIPLE an zohsaksawn a si kha. Donald Trump tla hi cu rel tam ṭul loin nunau lamih a rak hminsiat tamzia kan theih cio mi a si. Pathian ih political leader a hrildan hi mangbangza a si.

Pathian hin ṭul a ti ah cun milem betu Persia siangpahrang Cyrus kha hriak a thih mai ih, cutin a mi Judahpawl kha Babulon sal ihsi zalenak petu ah Cyrus kha a rak hmang mai a si. Bible kan siar asile Pathian hi a sersiammi milai, miphun pawl hnenah siseh zumlotu siangpahrang pawl hnen khalah a RAWLH-AW thluh ih, ro a rel camcin ti kan hmu thei.

Donald Trump hi hivekin nunau lamih hminsiatnak neitam rak si hman sehla President a ṭuan cinah cun Pathian mithmai zohten a nung ve thlang ih, cutin Pathian in nehnak a pe nasa tuk thlang. US President zohmanih an rak tuah ngam dah lo mi a foreign policy: Israel leh Arab ram UAE le Bahrain thawi remnak thuthlung a tuahter thei tla hi leitlunpi in manbangza thil mak a ti a si hi. Tulukin a kiangkap rampawl tifinriat lawn thluh a tum nan pu Trump lawngin a run ngam hai.

Leitlun ralpi 2 laiah German cun British tikulh laksak an tum thlang; cutikah ralṭha zetih German dotu an ṭul lai takah British Prime Minister Neville Chamberlain cu a thinphangin a khur thlang; hi pa hin Hitler hnenah remnak (appeasement) a thupten a rak tuahpi thlang. Cutikah British hruaitupawl cun an Prime Minister cu duh nawn loin an HLAWN ih, an RAM LE MIPHUN RUNSUAH DUHTU Winston Churchill kha Prime Minister ah an ret lohli a si kha.

CNLD hruaitupawl hi hminsiatnak nei dah khal an um ding, mi hrek cu hmin ṭha khal an si ding. Pathian ih political leader a hrildan hi mangbangza a si. Curuangah ram le miphun in vansanglamnak (Moral crisis) rapthlak a tawn tikah Pathian hin a sersiam mi milai, miphun hi runsuah a duh tikah cun mi fim le mi ralṭha, RAM LE MIPHUN CAWISANG A DUHTU siseh milem bia Cyrus vek khal a hril mai a si; PATHIAN CUN AN SUALNAK IHSIN A TAH VE HAI LO.

CNLD ah vote awla, Chin miphun CAWISANG aw.
Thuneihnak cu thinlung lennak a si
Chin miphun kut ah thuneihnak um seh

B. Lal Lian Thang

Leave a Reply

Your email address will not be published. Required fields are marked *