Chin mino Salai Thang Muan Khual an kap that nak san relfiang

Kum 19 mi, Chin mino Salai Thang Muan Khual thih thu thawn pehparin a kap thattu SAC ralkap cun kan thu a ngai lo ruangah kan kap mi a si ti`n a sungte an sim thei.

Salai Thang Muan Khual cu January 27 ah a hnaṭuannak ihsin a tlung ih, a pi tei` inn ah rawl a ei ta.

Cuih hmun ihsin zaanlam nazi 6 hrawng ah a suak ih inn thlen ti a nei nawn lo. Online tlangthan nakin siseh a sungte pawl in mihlo dinhmun in ni 2 sung an hawl hnu, January 29 ah Kalaymyo Regional Command Headquarters (RCH) compound ih ralkap siizung ihsin a ruak lak dingah a sungte an sim thei.

“January 29 ah amah sile si lo ruak zoh ciang dingin a farnu an sim thei ih, Cutin ralkap siizung ihsin a ruak kan phur tlung. Ataksa ah hremnak hriamhma tivek a um hran lo. Meithal kahnak hliamhma a um. A dunglam ihsin a pum lam ah a tlangsuak a bang. Ralkap pawl cun cawl aw kan ti ih a cawl duh lo ruangah kan kap mi a si an ti” tiah a sungkhat naivai mipakhat cun a rel ih “a thu cun cutin an rel nan atakah thil si dan a dang thei” a ti.

Salai Thang Muan Khual cu kan dung a luan zo tikcucaan ih Chin mino pakhat an rak kap that dahnak, Kalaymyo Bogyoke ziinpi kiangih NayChiaTaih le Taungphila ziinpial ralhraang ralkap pawl duty nak kiangkap ih kah that mi siding zum a um thu, tualsungum pawl in an rel.

Mistiri hnaṭuan Salai Thang Muan Khual cu zumthlum nat nei a nu le a unau pawl zohkhentubik a si ih, a sungte hrang ahcun innsangpabik an sun ral cu an inn, an Lo le an neih hmuahhmuah sun ral thawn a bangaw a si.

Leave a Reply

Your email address will not be published. Required fields are marked *