Chin mi in Tlangak vate Sinak dik kan thei Ciang Lo, Vate lakih Fim bik an rak si ziar

Tlangak vate hi kan nih Chin mi cun siatlam (annsia) khihhmuh nakah kan hmang tlangpi nan leitlun mithiam pawl cun vate lakih fimbik siding an zum.

Leitlun ram, Hnam tamsawn khalin Fimnak khihhmuh nakah an hmang tlangpi sawn. Bible sungih vate hmin kan hmu hmaisabik mi khal a siih Fim hai hlah sehla Noah in tirh a fial lo ding ti`n zumnak a um.

Miṭhen cun Bible sungih Leitlun tilikpi ṭum ah Tidai kang maw kang lo thlingthla dingah Noah in Tlangak vate a thlah nan, a aa tuk ruangah kir hna a thiam nawn lo ti`n an let nan, mithiam ṭhenkhat cun ruahnak (fim) a nei ruangah amahten kilkhawiaw thei ding a ringaw ruangah a kir nawnlo mi a si an ti.(Siatnak khihhmuhtu sibang sehla Pathain in prophet Elijah rawl petu ah Tlangak vate a hmang lo ding)

Noah Lawng sungah a khuahkhuah in rannung ciikim an phur ti a siih Noah ih tirh mi Tlangak kha a at ruangah zamhlo in va thi bang sehla tu ni ah Tlangak timi vate a um lo ding. Greek thuanthu khal ah vate fim Tlangak cu Apollo pathian in a nupi thlingthla dingah a fial tin a um.

Tlangak nuntu khawsakdan, kum 20 sung zirnak neitu University of Washington ih biologist John Marzluff cun “Tlangak hin biakawdan ṭong 100 lenglo an nei ve. An duh mi phorh suak thei dingin leihuatnak fungthal khal an tuah thiam” tiah, zirnak ih a hmuhsuah mi a rak sim dah.

Scientists pawl in University of Washington ih kum 5 sung zirnak an nei mi khal ah Tlangak pawl in milai hmel, mithmai ṭha/sia, an par ih ṭhatnak tuahtu milai hmel cu kum 5 sung an cingkeng thei timi an hmusuak.

Cuih zirnak ahcun U.S. vice president Dick Cheney zuk hmai khuh/kawr le Lung sungih um (caveman) milai hmai khuh/kawr an hmang. Tlangak pawl cun U.S. vice president Dick Cheney hmaikhuh buntu kiang ahcun daiziar in an um ih vate thangkam in kai ciamco tu caveman hmaikhuh buntu cu thinheng zet in an zon ciamco.

Kum 5 rei hnu ah Tlangak pawl cu cuih hmaikhuh thawn an va pan lala ih tuhlan ih rak piang hrih lo mi Tlangak dang pawl khal in caveman hmaikhuh buntu cu thinhengzet vekin an zon ciamco.

Hih thu ah, Zirnak ih telvetu ṭuanvonei pakhat cun, “Tlangak hi tuhlan ihsin a fim zet mi vate siding zum cia mi a si ih, tuih kan zir mi hin an fim ngaingai zia a nam hnget a si. Kan hmuhsuah mi ahcun Tlangak hin a malbik kum 5 sung, milai hmel a hminsin thei ti hi a si. Miṭhen thiamsang pawl cun vate lak ih fimbik an si, an ti ih phun 5 tlawngkai nauhak hnak in an fim sawn titu khal an um” a ti.

US ralkap khal in an ralkap mihlo hawl nakah Tlangak vate an rak hmangtum dah ih Osama bin Laden hawlnak khal ah hmang tum in Experiment an tuah dah a si.

Hminsin : Tulai, party kapawnak ah “Tlangak bang i” timi ṭongkam hmuh ding a tam ruangah Tlangak sinak kan thei ciang theinak dingah ka run ngan mi a si

Leave a Reply

Your email address will not be published. Required fields are marked *