Chin mi in Numi kan hmuhdan Thleng A Cu Zo

Khuavel in numi le mipa kan hmu dan hi a dang awk nasa. Tampi lakah mallai ka rak tarlang ding.

1) Ram uktu, kawhhran hruaitu, khuatlang hruaitu hrangah mipa cu fimthiamnak an nei lo khal len kan hril hai nan, numi cu ziangtluk ih zirsang an si khal len kan hnong hai.

2) Mipa cu lenglam hna lawng ṭuan ding in kan hmu nan, numi cu a leng thawn, innsaang hna thawn ttuan ding in kan hmu hai.

3) Mipa in a fala/nupi a thik/hat silen mi duhdawtthiam zet vek in kan hmu nan, numi in a tlangval/pasal a thik/hat silen thinlung ruahnak ṭha lo zet nei vek in kan hmu.

4) Mipa cu zu an in silen a dan vek in kan hmu nan, numi cu zu an in silen mi hlothlau vek in kan hmu.

5) Mipa in tuanten nupi a nei silen a pacang/puitling zet vek in kan hmu nan, numi cu tuanten pasal a nei silen leer tuk vek in kan hmu.

6) Mipa cu lo theih lo ih tlawngkai ding vek in kan hmu nan, numi cu innsaang hnattuan bawm ding fang in kan hmu.

7) Mipa cu nulepa ih an thihsan tikah ro tampi an co nan, numi cu ro co ding zianghmanh an nei ve lo.

8)Mipa cu miphun dang, khua dang, ram dang mi nupi ah a ṭhit silen miphun karhzai ter tu in kan hmu nan, numi in cuvek a nei ve silen mi hlo, silolen miphun hlo ter tu vek in kan hmu.

9) Mipa cu hruaitu (leader) ding in kan hmu ih, numi cu thluntu (follower) ding in kan hmu.

10) Mipa cu ziangtluk thinnatnak le riahsiatnak a ton khal len ṭap lo ding in kan hmu nan, numi cu cuvek a ton silen ṭap rero ding in kan hmu.

A ngaingai ahcun hihnak in a tam ding. Himi ka ngannak san cu numi le mipa kan hmuh hai dan kan thleng a cu tuk zo timi a thar in kan ruat tlang ka duh ruangah asi.

Numi asi ruangah, mipa asi ruangah ti`n thuthluknak tuah lo in a fit mi cu a fit vek in hmunhma pek/kian hna thiam thlang uhsi! Kan ram le miphun tungding tu dingah mipa lawng kan ṭul lo ih numi khal kan ṭul asi. Kan zaten lungrualten kan ding tlang thiam lawnglawng ah kan ram a ṭhangso ding asi.

Fale ciocio bangrepten nulepa in kan zoh hai ding a thupi zet. Laimi cu fa upabik le nautabik hrangah, silolen fapa hrang lawngah ro ṭhensak kan hmang. A ngaingai ahcun nulepa an thih zik tiang an zun le ek a thianfai tu le a kilkhawi tu a tam sawn cu an fanu pawl an si. Kan mai hrin mi kan fale an si thluh timi hngilh lo ten numi le mipa an si nak ah hngat lo in kan rilrah an sinak sawn ah ṭhum aw in ro rel thlang uhsi.

Mipa si ruangah ṭap lo ding tivek zirh awk nak tla hi nauhak te lai ihsin kan thok mi asi. Tahṭhimnak ah, nauhak pa te a bah ih a ṭap tikah “na cak tuk, ṭap hlah! mipa cu ṭap dan silo” tin a ṭap mi kha ningzak ding in kan zirh. Minung hmuahhmuah kan na caan ah, kan bah caan ah, kan tuahmawh awk caan ah, kan riahsia caan ah, kan ninghang caan ah ṭap ding in Pathian ih sersiam mi kan si. Mitthli tlak cu kan taksa hrangah a ṭha sawn mi asi.

Mai Esther Dimte (Ramthlo)

Leave a Reply

Your email address will not be published. Required fields are marked *