Chin media pawl in Pu Lian Luai hnak in Pu Soe Htet ih CM ṭuan ding an duh sawn

Chin ramkulh sungih Thuthang suah tu cozah theihpi Chin media zung pawl thurelkhawmnak an nei nak ah mitam sawn in Kum 2021 cozah thar ih Chin ram CM ṭuan tu ding ah tufang Chinram Chief Minister ṭuan rero lai Pu Salai Lian Luai hnak in Pu Soe Htet an duh sawn thu an relsuak a si.

Cozah thar ah media pawl hrang hmunhma a um thei deuh peimaw timi thulu thawn Chin media register ngah mi thuthang zung 7 pawl cun November 15 ah thurelkhawmnak an nei ih, cuih meeting ih mitam sawn cun cozah thar kai hnu Chin ram CM ṭuan tu ding ah Pu Salai Lian Luai lole midang ih ṭuan ding hnak in tufang Chinram Municipal Minister ṭuan rero lai Pu Soe Htet an duhbik thu an rel suak ih amah in CM a ngah ding an zumbik thu khal an relsuak a si.

Hih thu thawn pehpar in Chin World thuthang Chief Editor Salai Hung Htun Gei in “tufang ih Cozah kai rero pawl cu zokhal tlingbet ding ah ka duh lo. Asinan U Soe Htet cu media lam in zoh ah siseh Laitlang hrang zoh ah siseh a mah hi a ṭhabik ding ti hi ka hmuhdan a si” a ti.

Chinram Municipal Minister ṭuan rero lai Pu Soe Htet hi tufang Chinram CM ṭuantu Pu Salai Lian Luai hnak in media pawl ih thusutnak ah sihseh pehtlaih a olsam deuh ruangah tui dinthar ding mi cozah thar ah hin a mah in CM a ṭuan thei le media pawl khal zalennak an nei sinsin ding tiah zumnak an nei a si.

CW Chief Editor Salai Hung Htun Gei cun “CM Pu Salai Lian Luai cu cozah thar ah CM a ṭuan bet ding ka zum lo ih Hluttaw hotu dinhmun in a um ding ka zum sawn. Asinan, Hluttaw hotu ṭuan tu ding khal ah Media thawn pehtlaihnak a nei theitu si seh la ka duh” tiah a sim a si.

Hram:CH daily news

Leave a Reply

Your email address will not be published. Required fields are marked *