CHIN le MIZO: Kaupi, Saupi khuaruat thiam uhsi – Pu No Than Kap

Kawlram ah rem daihnak um thei dingih ka rak ṭuanpi Pu Zoramthanga, Mizoram CM thawn Kale-Kabaw le Laitlang fangkual in kan tlawn tlang laiah, Falam le Lairawn mipi tampi in “Burma mi tiin in rak dawitlantu le in nautattu MNF hotu rak hmuak le rak mikhual ṭhat a ṭul lo” tin an au celcel.

“Cuti ding a si lo e, kannih hi thenaw le huaaw kumkhua thei ding kan silo, kan tul veve can ah bawmaw rero zo, bawmaw rero lai ding kan si, thisen zawmpi kan si..” tin sim fiang rero khalle “Mizo loin kan nung thei zo, annih in hmuhsuamtu kan ṭulnak a um lo” ti cu mi tampi sanletnak a si men.

Tu ah, kan ruah ban loin ram a buai lala tikah, mi tampi himnak hawlin Mizoram kan pan. Duat zetin an neih thinnung suah in Mizo unau in in rak mikhual.Central thusuak kalh tiangin in humhim.

~Hivek hnu tal ah, kan mit a van phah deuh mahna!

Covid-19 suah pek March 2020 laiih Delhi ih harnak tong Chinmi hnenih Kawl paisa Ting 100 lai bawmtu khal tui CM Pu Zoramthanga thotho.

Curuangah, a hleicein minopawl in khua kau deuh kan hmuh thiam vivo theinak dingah THUANTHU malten (ngan zo a sinan) zohsal sehla:

Chin le Mizo timi hi hmin dang dang a sinan, thisen zawmaw, ramdang dang ih um miphun pakhat kan si ti cu el theih a si lo ding. Kan bangawknak le danglamnak hi rel veve zik sehla, bangawknak 90% a si lai ah danglamnak hi rel ding a malte ding, 10% fang a si ding.

Pupa san ah, tui ni ih Chin state le Mizoram karlak ah ramri (India le Myanmar) a rak um dah lo. Mirang san a hung thlen tikah, uk rem seh tiin Yangon, Assam le Chittagong ihsin Mirang bawi pathum in in uk. Hmanseh, uktu cu Mirang Cozah pakhat a si.

Leitlun ralpi (II) hnuah, India le Myanmar in zalennak an ngah veve ih, Chin cu Myanmar ah Mizoram cu India ah an um.

Himi hnu Kawlram in democracy dan in 1950-1962 tiang kan ukawk lai ah, kan ram dinhmun a ṭhat sawn ruangah kum 10 sung ah Mizoram ihsin Chinram ah mipum thawng hleinga (15,000) luan an rung vai man, ti a si. Hilai ah Chinram cu “Chin Special Division” in kan um ih, Mizoram cu Assam state hnuai ah Pengpi (District) pakhat fangin an rak um.

1954 Falam ih Electric a van thawk lai ah, Aizawl cu Electric a um lo a thim memmem lai

Kawlram democracy si lai ah, Mizo unaupawl hi Chinpawl in thei tawk in kan rak hum kan rak bawm. Thimnakah, Mizoram ihsin Kawl Ralkap ih lut Lt.Colonel bawi thleng thei cin cu, Chinram ih piang an si a ṭul ih, an piang taktak a si tin thuphan phuah tiang in kan rak dinpi.

1966 hnulam ah, MNF in Mizoram zalennak sual in ralpi an thawh veten, nasaten harsatnak an tuar bet. Ei in le nuntu khawsak dan ah an harsa vivo. Chinram lam ih rung vai le umhmun khuar khal an um peh vivo. Hi sung hmuah unau kan sinak cu a phunphun in bawm in kan langter.

ASINAN,
Mizoram ihsin Falam sizung ih dam lo rung um lai rori rak hek in mitthli thawn Mizoram ih tlunter mi khal kan nei.

1973-78 lai ah Mizoram ihsin rung vai pawl cu rak hek in, Kalemyo le Tamu thawnginn ah, cuisin India Nawkong thawnginn ah – hmun hnih hmun thum ah thawngtlak tuar in mitthli thawn Mizoram ih tlunter sal mi khal kan nei.

Can a herliam:
1975 hnulam ih Mizoram in District ihsin Union Territory dinhmun ah an kaisan veten, central Delhi lam ihsin, sumsaw nasaten a lut thawk. Khatlam ah Chinram cu ralkap uknak hnuai ah kan farah deuhdeuh. Cutin, “tuha le tlangrai a let aw” ih a linglet in Mizoram ah hramhring zuan in kan vung lut cupco ve.

1976 hrawngah Mizoram ih lut hi siar tham mi malte kan rak si nan, 1986 hnu Mizoram in State a ngah hnu kum 10 lai a hung rei cun thawngza tel in kan pung. Chinram ih khawte lam tiang in Inn khat mi pakhat tal Mizoram thleng lo an um lo ti a si. *A hrek hnenum ah, a hrek lei lai le thing at ah, a hrek tlawng saya, a hrek sumdawng, a hrek college kai ding ah.

Hi sung hmuah Mizo unaupawl khalin in rak mikhual ve. Mai khua le ram vekin duhduh in kan vung tlangleng thei ve. India ram college kai ih paisa bawmnak ngah thei ding le Indian passport tiang nei thei dingin Mizo rammi sinak in lakpi ih in bawmmi khal bo lo.

Cutin an ram ih lut le suak kan tam vivo tikah, mi hnawksak um ṭha duh lo le rit theih thil phun phun tiang tawlh luttu khal kan um cih ve. Culai ah iksik ding tlak ih sumsaw la lut thei le cathiam sang khal kan um ve vivo.

Himipawl ih rahsuah cu “Inntek Mizo unau pawl ih mikem, iksik, huat le dodalnak” a si. A netnak ih a hngawr soh mi cu “Burma mi hnawh chhuah” ti a si.

Ngate ṭawihthu pakhat ruangah kho sung ngate an thut thluh bangin, kanmah Chinmi lala khal ih kan huat le kan rem lo dingmi misual hnihkhat ruangah, kan zaten dawitlan kan tuar phah can khal a um.

Theih ṭha zet cu:
Rampi pahnih ih neih mi “Danpi le Dante” vek a sile, ramri kaan in Mizoram ih kan lut le kan suak hi India Cozah hnenin siannak Visa neih hmaisak a ṭul. Mizo khalin Myanmar Cozah hnen in siannak an ngah ve a ṭul. Cumi tel lo cun, Tiova kan kaan veten India in in kaih thei bang in Kawlram khalin in kai thei ve.

Hmanseh ramri kan kaan veten kham le kaih tuar kan um hrih lo ti theih a si. Hihi cahnah par ih ramri rinmi in unau thisen zawmpi kan sinak a khampit thei lo ti langtertu pakhat a si.

TLANGKAWM:
A selam veve zoh cun, Mizoram ihsin ra an si ruangih hek tuar le tlungsal an um. Chinram ihsin vung lut kan si ruang ih hek tuar le tlunter sal mi khal kan um ve.

A ṭhalam veve zoh cun harsat le retheih kan tawn tikah, unau sung khat pan in kan panaw veve, kan mikhualaw veve, kan bawmaw veve.
Curuangah,

1. Thinnatnak le tuah siatawknak hnakin, caan tam sawn le mi tam sawn hnenih kan langter veve mi duhdawtnak hi sang sawn ah khaisang thiamin, dunglam thu cu hmailam hrangih in zirh fimtu fang ah hmang thiam in, Mizo le Chin unau kan sinak hi cawisang in dinpi sinsin a thupi.

2. Mizoram le Chinram minung (thisen zawmaw unau) zate komkhawm hman hi, in karceh ih in ukbettu Kawl le Vai lakah zatekhat fang kan si; kumkhua in doaw rero, hmusualaw rero, nautataw rero ding ci kan si lo.

3. Na duh maw duh lo maw, na pawm maw pawm lo maw, thisen unaunak zoh tikah, Mizo cu Chin, Chin cu Mizo a si ti hi, el theih a si lo. Cui kan unaunak ziangtin kan fehpi ih kan nunpi timi parah, miphun zah tlak le zalen rampi kan din thei maw thei lo, ti a ṭhumaw ding.

4. “Pawi, pawite.. tin in nautat” kan ti lai ah, “Lusei, Marsia.. tin in nautat” an tive ti theihpi awtawnin, hivek awkam cu Leitlun hnam khat le hnam khat, hrin khat le hrin khat karlakah an hmang thluh ti theiin, thupi hlapi reltlang thei lonak tiang ah hmang hram hlah uhsi.

Nautat awkam nehnak ṭha bik cu, nautattu hnakin dinhmun le sinak sang ih um thei hi a si ti cing ringring hram uhsi. Mai tluk lo mi kan nautat ngam dah kel lo, kan nautat hman ah an dunglam le an umlo can lawng ah a si ṭheu.

MITTHLAM IH CUANG
Chinram le Mizoram hi ramri ṭhentu um loin, ram pakhatin umtlang thei bang sehla, kan thil zir cak dan le kan nunphung le zin le dan lenzia zoh tikah, kum rei lote ah leitlun ram lak ih ṭhangso bik le zohṭhim tlak lakah kan tel ban ding..*Sihte cangcel zawn bang a dunglam cai bo lo cing khal in.

Unau thisen zawmpi doral ah an ret dah kel lo. A rettu cu an tluang rei dah lo. Mizo le Chin cu, vanduai ah, ramri in in ṭhen hmansehla thinlung lam tal cun ṭhenaw hram hlah uhsi. Blood is thicker than water!

Leave a Reply

Your email address will not be published. Required fields are marked *